Kangmei tuar tan Prince Harry te nupa thawk chhuak ve

Mi 16 thih tawhna, Thawhlehni atanga United States-a California ram kang nasa taka baihvai mekte tanpui hna thawhnaah Prince Harry leh a nupui, Meghan Markle te chu an thawk chhuak ve a. Zirtawpni khan inthiar chhuakte awmna atana hman mek, Pasadena Convention Center-a ei tur semnaah an thawk ve.
An nupa hian World Central Kitchen (WCK) dintu, Jose Andres bakah mahni inpea thawktu te leh kangmei tuar te an kawm.
WCK hi Sussexes’ Archewell Foundation nena inkawp nghet tak an ni a, a thlawna ei tur petute an ni a, tun tumah pawh hian a thelh hna thawktute nen ei leh in tur an pe a ni.
Pasadena Mayor Victor Gordo chuan Prince Harry leh a nupui hi chawhma lamah chuan hmai tuamin mi pangngai angin ei tur an sem a, tumahin an hre lo tih a sawi a. “An nupa hian mi tana tangkai nia mi puitu nih ve an duh a ni,” tiin CNN hnenah a sawi.
“Intihlar tuma lo thawk chhuak an ni lo va, hna thawk tura lo kal ve an ni,” a ti a. An awm dan chu ‘mi ropui tak, mite tana inpe nun nei’ an ni tih a sawi bawk.
Mayor Gordo-a hian kangmei chhuahna hmun leh a tuarte pawh an tlawh tih a sawi a. “A tuartute kan tlawh a, a kanna hmunte pawh mit ngeiin kan hmu a ni,” a ti.
Kum 2020-a Montecito, California-a inbengbel tan, Duke leh Duchess of Sussex hian thawmhnaw, naupang thil leh ni tin mamawh chi hrang hrang an thawh nia sawi a ni a. An thiante tan an chenna in pawh awmna atan an ruahman nia sawi a ni bawk.
Ningani khan an nupa hian an website-ah ram kang chungchangah hian thu chhuah an lo siam tawh a. Hetah hian mite chu thawmhnaw, naupang lawm leh ni tin mamawhte a mamawhtute tana thawh khawm turin an lo sawm tawh a. Kangmeiin a man mai theihna laia awmte chu thuneitute thu zawma a rang thei anga an himna tura insaseng turin an ngen bawk.
Los Angeles-a Thawhlehni atanga hmun hrang hranga ram kang mekah hian hriat theih chinah mi 16 an thi tawh a, kang thelhtuten theihtawpin an bei let mek zel a. Mi cheng nuai 1.5 chuang chu hmun hima insaseng turin an ti tawh.