Kangmei Ven Hapta hmang tan 2024-ah tum 3612 ram a kang

Kumtina hman thin Kangmei Ven Hapta chu Thawhtanni atang khan Mizoram pumah hman tan a ni a. Kumin thupuiah “Kangmei ven hi kan tu leh fate hmakhua atan a ni” tih hman a ni. Hapta hman tur hawnnaa tarlan danin, Forest Survey of India-in kum hnih dana report a tihchhuah thin, state tin ramngaw neih dan – State of Forest Report 2023 ah Mizoram pumah ramngaw awm zatin pun lam an pan a. Hei hi report tihchhuah atanga ramngaw awm zat a pun vawikhatna a ni. Mizoram Environment Forest & Climate Change department chhinchhiah danin, kum 2024 chhung khan ram kang 3612 a awm a, ram hectare 3917.74 a zau a kang. Heng zinga 116 chu ramngaw kang niin, hectare 94.5 a zau a ni. A bak hectare 3496 chu lo hal (jhum cultivation) kaihhnawih niin, hectare 3823.24 a zau a ni.
State of Forest Report 2023 tarlan danin, Mizoramah ramngaw chhah (very dense forest) square km. 261.52 a awm a, hei hi ram pum zau zawng atanga chhutin zaa 1.24 a ni.
Ramngawa chhal theih (moderate dense forest) sq.km. 8635.76 awmin, zaa 40.96 a hauh a; ram bua (open forest) sq. km. 9093.8 (43.14%) a awm tawh a ni. Hei bakah hian loa neih tlak loh ram chhia sq.km 314.54 (1.49%) Mizoramah hian a awm nia ngaih a ni.
Kangmei Ven Hapta hi February 10-15 inkara hman tur niin, kangmei venhim kawnga hma la tha ber district leh khua lawmman pek an ni ang. Huan/ leipui tur mimal rama vat chuan March 5 hmaa hal turin sawrkarin a ti a, khawtlang theh ram neitute chuan March 15 hmain an lo an hal tur a ni. Hmunphiah hmun nei chuan March 31 ralhma in an hal thei ang.
Aizawla Kangmei Ven Hapta hawngtu EF&CC commissioner & secretary H Lalengmawia chuan, ram kang tur ven chu mitin mawhphurhna a ni tih a sawi a. Ramkang chu khawvel pum harsatna a ni, tiin, chuvang chuan ram hrang hrang pawhin kangmei venhim hna thawktute pualin ni serh bik an hmang thin tih a sawi. Kan chhehvela nungcha leh ramngaw bakah boruak venhim chu mitinin, khua leh tui tha ni tura kan mawhphurhna a ni tih sawiin, Mizoram chu India ram state zingah ziak leh chhiar thiam tamna a nih angin, dan zawm kawngah pawh entawntlak ni tura beisei kan ni tih a sawi bawk.
Fire Prevention Week hi Mizoramah kum 2000 atang khan hman tan a ni a, kumin hi a tum 26-na a ni. Kum 2009 atang khan district leh village level fire prevention award sem tan niin, kuminah pawh hian award hi sem leh tum a ni.