Rihanna chu Billboard Artist 100 chart-ah a No.1 a, he chart an siam tan, 2014 atanga a No.1 vawi khatna a ni. Rihanna hian Super Bowl halftime show-a a perform zar zoin a hla leh album hralh a kal tar leh a, chu chuan Artist 100 chart-ah pawh No.22 atangin No.1-ah a vawrh kai ta a ni.
Billboard Artist 100 chart hi kar khat chhunga US-a zaithiam lar dan tehna niin, chart ranking siam nan hian kar khat chhunga US-a an hla leh album hralh tam dan te, streaming leh radio airplay te chu tehna pawimawh a ni.
Super Bowl halftime show-a a perform hnuah a hla leh album hralh a kal thar hle a, a hla hrang hrang pawh US-ah on-demand official stream maktaduai 166.1 a tling a, hei i Super Bowl halftime-a a perfom hma kar khat aiin 156%-in a pung a ni.
Rihanna album panga chu Billboard 200 (albums) chart-ah a lang nghal a, ‘Anti’ chu No.8 niin, Good Girl Gone Bad (No.15), Unapologetic (No.18), Loud (No.26) le Talk That Talk (No.49) te chu chart-ah an lang a, Rihanna hi tun kum 50 chhunga he chart Top 50-a album panga chin tum khata lanpui thei zaithiam pasarihna a ni. Hetiang tithei zaithiam dang te chu- Taylor Swift, Mac Miller, Prince, Whitney Houston, Glee cast leh Garth Brooks te an ni.
Billboard Hot 100 chart-ah pawh Rihanna hla pali a lang a, chung zinga pathum chu No.1 hlui an ni a, ‘Umbrella’ featuring Jay-Z chu No.37 niin, ‘Diamonds’ (No.44), ”We Found Love’ featuring Calvin Harris (No.48) te niin, a hla dang ‘Lift Me Up’ chu No.41 a ni bawk.
Kar khat chhunga US-a zaithiam lar ber Rihanna
Get real time updates directly on you device, subscribe now.
Next Post