Kar tawp football hnuhma

Kartawp khan Europe a tualchhung league lian zual khelh chhunzawm a ni a, inkhel hmuhnawm tak tak thlir tur a awm zui leh. Inkhel hmuhnawm tak takah hnuhma thar hnutchhiah a awm belh leh nual a. Kar tawpa football hnuhma langsar zual kan hrut kual leh ang.
English Premier League
Pathianni zan khan table-a hmahruai mektu Liverpool chuan Anfield-a an mikhual Wolves chu si 2-1 in an lo hneh. Liverpool tan hian Mohamed Salah chuan penalty atangin an goal hnihna a thun. Salah hi EPL season kal mekah goal 37-ah zet a inrawlh (scorer & assist) tling tawh a. EPL-a Harry Kane leh Cristiano Ronaldo ten season an hman that ber tum a nih rual a. Kane leh Ronaldo tlanpelh theihna hun remchang tha zet mai Salah hian a nei.
EPL-ah hian season khata goal contribution ngah ber chu chu goal 47 a inrawlh tling Alan Shearer leh Andrew Cole te an ni. Salah hian 2017-18 season khan goal contribution 42 zet a lo nei tawh bawk. Salah hian season kal mekah penalty atangin goal 7 a thun tling tawh a. EPL-ah season khatah penalty atanga goal thun hnem ber Andrew Johnson chu goal 11 thuntu Andre Johnson a ni. Salah hian EPL-ah penalty vawi 32 a pet goal tawh a, Steven Gerrard leh Harry Kane ten penalty atanga goal an thun zat nih rualin a chungah hian Alan Shearer (56) leh Frank Lampard (42) te an awm.
Wolves laka Liverpool hmahruaina goal thuntu Luis Díaz khan EPL season kal mekah goal 9 a thun tling tawh a, EPL-ah goal a thun tam ber tum a ni. Diaz hian season liam ta khan khelh 37 atangin goal 8 a thun. Diaz hian EPL-ah goal 25 a thun tling tawh a, Colombian zingah EPL-ah goal 25 thun tling thei palina a ni. Colombian zingah EPL-a goal 25 chin lo thun tawhtute chu: Juan Pablo Ángel (44), Hamilton Ricard (31) leh Hugo Rodallega (29) te an ni.
Club lian leh ropui Manchester United an che chhe tluang zel. United hian season kal mekah goal thun loh vawi 10 an nei tawh a, season kal mekah goal thun thei lo ber pahnihna niin table mawngphaha awm mek Southampton nen an dinhmun a inang a. An chungah hian match 12 ngawta goal thun thei lo Everton an awm.
Manchester United hi 2023-24 season tan atanga tun thlengin EPL-ah vawi 26 ngawt an tlawm tawh a, hemi chhunga tlawm hnem palina niin Wolves (34), Brentford (30) leh Sheffield United (28) te an chungah an awm.
Inrinni zan khan champion lai Manchester City chuan an mikhual Newcastle United chu 4-0 ngawtin an sawp. City tan hian thlasik bazar laia an lak luh Omar Marmoush chuan hattrick a siam a. Marmoush hi EPL-ah match thum chauh khel chunga hattrick siam thei pasarihna a ni.
Manchester City si ngak Ederson chuan EPL-ah assist vawi ruk ngawt a nei tawh a, si nghak zingah EPL-a assist nei nghah ber a ni. Ederson hi si khat zingah season khata assist vawi thum aia tam nei thei awmchhun a ni mek bawk.
Inrinni zan khan Arsenal chuan 2-0 in Leicester City an hneh. Gunners hi khelh 15 chhung tlawm nei lovin an kal tluang ta chiah a, hei hi an manager ropui Arsene Wenger-a chhuah hnuah tlawm nei lova an kal tluan rei ber tum a ni.
Wolves tan Matheus Cunha a chetha tluang viau a, season kal mekah khelh 24 atangin goal 12 a thun tling der tawh. Season kal meka goal 12 ngawt a thun hi season liam taah game 32 atanga goal a thun zat a tling der tawh.
Spanish La Liga
Inrinni zan khan champion lai Real Madrid leh Osasuna te chu 1-1 in an inhnehtawk. He inkhelah hian Real Madrid tan Kylian Mbappe chuan goal khat a thun. Mbappe hian La Liga-a a season hmasa berah goal 17 a thun tling der tawh a, season kal mekah amah aia goal thun tam awmchhun chu goal 20 thun tling tawh Robert Lewandoski chauh a ni. France captain Mbappe hian season kal meka inelna hrang hrangah goal 25 thun tling tawhin, hei hi season sarih chhung a zawna goal 25 chin a thun zawnna a ni chiah bawk.
Real Mdrid hi season kal mekah an vanduai thei riau a, penalty vawi 8 ngawt an chawi tawh. Hei hi La Liga season khata penalty an chawi hnem ber record (2020-21) zat a ni der tawh. Real hian kum 2022 hnu lama penalty an chawi zawn vawi khatna hun an tawng bawk.
Osasuna nen 1-1 a an inhnehtawk tum hian a tawngkam mawi loh vangin Real Madrid midfielder Jude Bellingham chu chawlhlawk hmain hnawhchhuah a ni. Belling hi Real Madrid player zingah Sergio Ramos (2013) hnu lamah chawlhlawk hmaa hnawhchhuah leh hmasak ber a ni.
Manchester United-a tlatlum lo Antony chu Real Betis-ah a tlatlum ngang mai. Antony hian Betis tan vawi li khel tawhin goal thum lai a thun tawh a. League a hmachhawn tawh zawng zawngah match thum goal a thun zawn hmasak ber tum a tawng ta hial. Old Trafford-ah vul zo lo mah se Spain lamah Antony hi a vul ta viau thung.
Italian Serie A
Pathianni zan khan Juventus chuan 1-0 in an mikhual Inter Milan hnehin an chak tluang lai an tihtawpsak. Juventus leh Inter Milan te hi an intum hnuhnung vawi sarihah chak zawk an awm thei lo zawn tawh a. Pathianni zanah kha chuan Juventus in harsa takin hnehna an chang ta a. Inter Milan in table chung ber luah an tumna kawng an dalsak tel bawk.
Juventus tan hian Francisco Conceição chuan season kal mekah goal 5 a thun tling tawh a, goal a thunna inkhelah hnehna an chang vek nghe nghe a ni.
Gian Piero Gasparini chuan a club enkawl Atalanta tan point 600 a hlawhchhuahpui ta a. Gasparini hi Serie A-ah an team enkawl (Team khat bik) point 600 hmuhpui thei pahnihna a ni a. A chungah hian Massimiliano Allegri (663) a awm.
German Bundesliga
Inrinni zan khan champion lai Bayer Leverkusen leh Bayern Munich te chu goal awm lovin an inhnehtawk. He inkhelah hian table-a hmahruaitu Bayern Munich chuan shot an nei miah lo. Hei hi kum 2008 hnu lamah game khata shot an neih miah loh vawi khatna a ni. Champion lai Bayer Leverkusen hi season kal meka inelna hrang hrangah an mualah vawi 17 zet tlawm an nei lo zawn tawh a. Top 5 European leagues club zingah Season kal meka inelna hrang hrangah an mual tlawm lo zawn rei ber an ni mek.
Leverksen manager Xabi Alonso hian Bayern Munich a ngam ang reng viau a, an intum hmasak vawi ngaah vawi thum a team a chakpui a, vawi hnih dang an inhnehtawk a, tlawm a nei miah lo. Alonso hi Bundesliga manager zingah Bayern Munich an hmachhawn hmasak pangaa tlawm nei miah lo awmchhun a ni.
French Ligue 1
Marseille tan Mason Greenwood a chetha tluang hle a, season kal mekah goal 15 a thun tling der tawh. Greenwood hian season khata goal a thun tam ber hun duhawm a tawng mek a ni.