Kawng chhiat vangin harsatna
Tuialhthei a thlen mumal loh avangin kar hmasa tawp lamah khan Aizawla filling station te’n tuialhthei pek chhuah tur an neih mumal loh lai a awm a, ni tin mamawh thil dang thenkhat thleng mumal lo pawh a awm.
Mizoramin ni tin mamawh thil hrang hrang a lakluhna kawngpui a chhiat avangin harsatna a thleng mek a, nasa tak chu a la ni lo.
Kar hmasa lamah tuialhthei a thleng mumal lo a, Inrinni atang khan kawng a chhiat vanga lungawi lovin tuialhthei phurtute an nuar bawk. Hetih lai hian Thawhtanni lamah tuialhthei hi a vang hran lo a, filling station-ah lak tur a awm; Mizofed-ah pawh Chawlhni khan tuialhthei hi tlem azawng a thleng.
Sairang leh Khamrang inkar leh Khamrang leh Kawnpui inkar vel a chhe zual a, lirthei khalhtute’n harsatna an tawh zualna chu heng lai vel hi a ni. Bualpui velah te Aizawl pana tlan lirthei an ding a, kar hmasa tawp lama ding truck khalhtu pakhat chuan Bualpui atang hian ni sarih chhunga Aizawl a thlen hman a rin loh thu a sawi.
Truck a tlu thin a, a khalhtute leh a neitute chuan truck a tluk avangin an lirtheiin a tuar tih te, a tluk loh pawhin lirthei a inelh nasat avangin lirtheiin a tuar a, sum an seng nasa tih an sawi.
A tlu leh a inelh bakah an tlan chak thei lo a, kawngah an thang rei avangin harsatna an tawk tih an sawi bawk.
Tun hnaiah Mizoram Tippers Association, Kolasib District te’n kawng chhe zual lai hi an siam a, mahse rei a daih tak tak thei lo an ti. Black top a nih loh chuan ni hnih khatah lirtheiin an rap chhe leh mai a, sum leh tha sen pawh a uiawm zawk an ti.
Tun hnaiah ni tin mamawh thil a thleng tha lo a, kar hmasa tawp lamah khan agency-ah tel leh bawnghnute a thleng meuh tawh lo tih thu dawn a ni.
Online hmanga sumdawnna pawh kawng chhia hian a nghawng a, tun hnai chawlhkar hnih vel chhungin mi thil chah a thleng zeuh zeuh chauh an ti. Hei hian online hmanga sumdawnnaa thawkte a nghawng a, bungraw petute’n hna an nei mumal lo tih an sawi.
Nikum lamah pawh hetiang harsatna hi a lo thleng tawh thin a, kuminah pawh a thleng tawh. May thla tawpah khan Mizoram Truck Owners Association leh Mizoram Truck Drivers Association te’n kawng hi a chhe zual lai siamthat a nih loh chuan tlan loh an lo tum tawh a, mahse sorkarin siam a nih tur thu an sawi avangin an ding ta lo. Chumi hnuah kawng hi a la chhe ta reng a ni.