Kawng siam tha loah action lak hma chu kan umzui ang – Congress Thalai
Ramrikawn to Sakawrtuichhun NH-54 kawng hnathawh tha lo leh lungrem tha loah sawrkarin action a lak hma chu an umzui zel dawn tih Congress Thalai chuan an sawi.
Congress Thalai Hqrs. hruaitute chuan Thawhlehni khan Ramrikawn to NH-54 via Sakawrtuichhun hi a hmunah an en tih an sawi a. Vice president Lalsanglura Sailo sawi danin, he hna hi sawrkar hmasa hunlaiin sanction tih fel vek tawh, restricted tender-a inpek tum, inthlan puan a nih tak avanga work order erawh pek chhuah hman loh a ni a. Restricted tender hi dan dik taka tih a nih loh avangin mi thahnemngaiten ZPM sawrkar hnu ah cancel turin an ngen a. Chief minister Pu Lalduhoma chuan 2024 February 24 khan restricted tender reng reng CM phalna la hmasa loa pek loh tur, tia a chhuah hnu lawkah, helai kawng hna thawh tur hi pek a ni zui a, party mualphona a thlen dawn avangin work order issue hma in cancel leh a ni tih a sawi.
Hetiang a nih lai hian, General Financial Rules leh PWD Manual bawhchhiain, restricted tender hmanga thawh tir an tum chu departmental work-in chief minister duhsak Pu Vanchunglura, ZPM PAC member an thawh tir leh si tih sawiin, “Kawng siamna atan hian nuai 400 chuang dah a ni a. Departmental work-a inthawh tir chi pawh nia lang lo hna lian hi, a a hun taka a zawh theih loh avang leh hna a chhiat avangin harsatna tam tak a thleng zui a ni,” a ti.
He kawngpui siam leh kawng siamna atana lungrem chu a tha lo hle a, a hun taka zawh a ni lo bawk niin Congress Thalai hruaitu hian a sawi a. Chuti chungin quality test result pawh a chhe hle niin a sawi.
He thil hi June 23 khan ZPM office-a inkhawmah Aizawl West-I bialtu MLA, adviser to CM Pu TBC Lalvenchhunga chuan a ruh langin a sawi chhuak niin a sawi bawk.
“He kawng siam chhe lutuk avanga harsatna thlengah hian sawrkarin mawh a phur a, kawng siamna hmanraw hman a chhiat bakah cement proportion a diklo nasa hle. Hnathawh a chhiat em em chhan hi, hna inpek dan dik lo, induhsakna uchuak leh contractor ni lo ZPM nihna avanga hna thawh vang a ni. PWD-in he kawng siam tura ruahmanna leh hnathawh dan tur a siam point 8-ah pakhatah mah a tling lo fai vek. Sum chauh duha mipui sum dik lo taka luangral hi a pawi a. Kawng siamtu hi sawrkar hian a phu ang ngeia hrem turin Congress Thalai chuan kan phut a ni,” Lalsanglura Sailo hian a ti.