Kerala-ah Committee on Petitions inzir

Kerala-ah Committee on Petitions inzir
Mizoram Legislative Assembly-a Committee pakhat – Committee on Petitions chu Kerala-ah kalin, Zirtawpni khan Kerala Legislative Assembly-a Assembly Committee on Petitions nen an hnathawh dan leh kalphung zirchiangin an inkawm.
Mizoram Legislative Assembly Committee on Petitions atang hian chairman T Lalhlimpuia bakah member pahnih – H Lalzirliana leh Prova Chakmate an kal a. Assembly Secretariat officer leh staff-ten an tawiawm. Committee on Petitions Kerala aiawh hian chairman Antony Raju leh member KK Rema bakah Kerala Assembly secretary Dr N Krishnakumar leh Assembly Secretariat official-ten an lo dawngsawng a ni.
Inkawmnaah hian Committee on Petitions case hrang hrang sawihoin, procedure leh proceedings inzir tawn sak bakah siam danglam an duhte sawi a ni. Committee on Petitions hi mipui leh sawrkar inkara palai pawimawh tak a nih thu sawi niin, mipuiin tangkai zawka an chhawr theihnana hmalak dan tur pawh sawiho a ni.