Khalistani kal fawrten London-ah Jaishankar tibuai

Khalistani kal fawrten London-ah Jaishankar tibuai
Khalistani kal firfiak pawlte chuan External Affairs Minister S Jaishankar-a’n London a tlawh mek chu tihbuai an tum a, venhimna pawh an paltlang hman.
Jaishankar-a hian Chatham House a chhuahsan laiin a lam panin mipa pakhat a tlan vak a, police officer-te hmaah Indian hnam puanzam a pawt thler bawk.
Video darhah chuan mi pakhat hian minister convoy lam hi chak taka tlanin a pan a, officer-ten lo dan tumin an lo bei bawk a. Au chungin hnam puanzar a pawt thler a; mahse, hemi hnuah hian police-in la kiangin amah ang mi dangte pawh an la kiang bawk tih a lang.
Video dangah chuan Khalistani kal firfiak pawlte chu Jaishankar-a awmna hmun pawnah an inhawr khawm a. Anmahni flag an vai bakah Khalistani thlawpna thu an au chhuahpui bawk.
Heng thil hi External Affairs Minister Jaishankar-a’n Thawhlehni atanga Pathianni thleng awh tura UK a tlawh lai meka thleng a ni hlawm.
Jaishankar-a hian a hmain Chevening House-ah UK Foreign Secretary David Lammy kawmin ram pahnih inkar thil tam tak – thawhhona tur te, politics thil te, sumdawnna lam te, zirna, technology leh mipui inpawhna tur thil te an sawi dun.
Chatham House-a hun a hmannaah hian Jaishankar-a chuan US President Donald Trump-a’n Pakistan nena Kashmir chungchanga buaina awm chin fel a rawt dan chu Prime Minister Narendra Modi-a’n a pawm lem loh thu a sawi.
Jaishankar-a chuan India dinna chu a ngai reng a, mi dang inrawlh a rem ti lo tih a sawi a. India chuan thil tha a awm theih nan hma a la mek zel a, Kashmir inhung bikna, Article 370 pawh hlimin hmasawnna hna tam tak a thawk a, inthlan a huaihawtah pawh vote thlak an tam hle tih a sawi.
Hetih rual hian tuna Kashmir chungchanga chin fel loh la awmte chu India thunun phak piah lam a awm nual tih a sawi a. “Kashmir min ruksak min pek leh kan nghak mek a, Pakistani-ten dan lovin an luah a. Hei hi tihfel a nih chuan Kashmir buaina hi chin fel nghal a ni ang,” a ti.