Khawvela cinema en hrat ber
Khawvela cinema en hrat ber
USA a cheng Zach Swope hian cinema en a hrat ve ngar ngar khawp mai, kum khat (thla 12) chhungin cinema vawi 777 a en hman a, Guinness World Record, thla 12 chhunga cinema en hnem ber record a siam. A hmaa hetiang record chu 2018-a Vincent Krohn-a siam niin, ani hian thla 12 chhungin cinema vawi 715 a en hman ve thung. Zach hian July 2022 leh July 2023 inkarah cinema hi vawi 777 a en hman a ni.
Zach, kum 32, hian cinema en hi tunhma atangin a lo hrat ve tawh hrim hrim a, dan naranin kum khatah vawi 100-150 vel hi chu a en deuh ziah. Tun tumah hi chuan record siam tum hrim hrima bei a ni a, film hrang hrang pawh a en hnem tawh khawp mai.
Guinness guidelines-ah chuan record siam tur hian cinema hall-a reilote va thut ve ringawt kha a tawk lo a, a film pum pui an en tluan zak zel tur a ni a, film en laia mutthluk leh thildang lo tih daih, entirnan phone khawoh te pawh phal loh a ni a, thil ei leh in pawh khap a ni.
Zach pawh hi record siam tuma a beihnaah hian cinema hall-a thawktu ten an film en lai an thlithlai bik ziah a, dan a bawhchhia em tih an report leh thlap thin. Zach hian Regal Unlimited Membership a neih avangin Regal Cinemas-ah deuh vek a en thin a, a membership nihna hian thla khatah dollar 22 sengin a duh tawkin film a en thei a ni.
Zach hi hna nei lo, pa awlthawng tak a ni chuang lo a, hna ngghet (full-time job) nei niin, zing dar 6:45 atanga chawhnu dar 2:45 thleng a thawk thin a, a hna thawh banah film pathum vel a en thin a, film sei lo deuh a thlang thin bawk a ni. A tirah chuan thla 12 chhunga vawi 800 en hman a tum a, mahse, a pha dawn lo tih a inhriat hnuah lucky number 777-ah a duhtawk ta a ni.
Zach hian film ngai pawh a en nawn fo a, a en nawn ngun ber chu Puss in Boots: The Last Wish kha niin, vawi 47 a en nawn a, The Super Mario Bros. Movie pawh kha vawi 35 a en nawn a, Thor: Love and Thunder pawh vawi 33 a en nawn. A favourite film hi Spider-Man: Across the Spider-Verse kha a ni a, hmuhnawm loh a tihber chu The Devil Conspiracy a ni ve thung.