Kolasib-ah cyber crime inhrilh

Kolasib-ah cyber crime inhrilh
Electronic media leh information technology hmansual chungchanga inzirtirna, ‘Seminar on Cyber Crime’ chu Thawhlehni khan Kolasib-ah neih a ni a, Kolasib bialtu MLA, deputy speaker Lalfamkima’n a hmanpui.
Seminar hi Mizroam Journalists’ Association leh Mizoram Police buatsaih a ni a. MJA Gen. Hqrs vice president C Lalhmachhuana’n kaihruaiin, MJA Kolasib District president Andrew VL Auva’n inlawmna thu a sawi.
Deputy speaker chuan khawvel thiamna leh changkanna thangzelin mihring tan kawng tam takah hmasawnna a thlen lai hian, sualna lamah pawh nasa takin kawng a hawng tel tih a sawi a. Thiamna leh hriatna chu mitin kutphaha hum theih maia banphak awlsama a awm tawh avangin mitinin internet leh mobile phone hman dan thiam kan zir zel a pawimawh tih a sawi.
Cyber Crime SP VL Lura Hauzel pawhin Mizoramah online hmanga sum inchhuhsakna, mipat hmeichhiatna hmanga intihmualphona leh social media-a mimal tihmualphona thil hrang hrang a tam tawh hle tih a sawi a. Hemi lam buaipuitu police-te an tlem a, case buaipui tur a tamin a pung chak hle tih a sawi a ni.
Seminar-ah hian Cyber Crime Cell inspector MS Dawngliana’n powerpoint hmangin cyber crime chungchang a zirtir a ni.