Kuhva leh sawrkar pathum…

Congress hun lai khan Zokhawthar-Champhai-Aizawl inkalpawhna kawngpui chu, kuhva phur lirthei a veivah nasat avangin a chhe nasa a, mipui harsatna namen lo thlentu a ni. Kum 2017-ah, Champhai Zotlanga YMA inkhawmpui nghah a nih avangin kawngpui chei that hram a ni. Hemi hma kum 2016 khan Champhai district pumah lirthei ke paruk aia tam hmang chin tlan khapna thupek siam a ni tawh bawk. Dan kalha Mizorama lo lut Kuhva-in Mizoram a nghawng dan hrang hrang kha sawi sen a ni lo ang.
Hun a lo kal zel a, MNF hun laiin 2020-ah Champhai district Magistrate-in kuhva phur lirthei bik tan Champhai chhuahsan khapna thupek a chhuah hial a, chuta tanga a hnu lama harsatna leh buaina hrang hrang Mizoramin a hmachhawn chhoh dan pawh a hrechiangtu chu mipuite hi kan ni.
ZPM hi sawrkarna chelh hlim hlawt an la ni a, Mizorama kuhva buaina chinfelna hun an la ngah deuh a, term khat pawh la hmang zo lo an nih avangin, ‘chingfel thei lo sawrkar’ han tih em atan chuan a la hma deuh ang a. Chutih rual erawh chuan, ‘thla khat chhunga Mizorama smuggling tihtawp’ tuma an insawi batna erawh a hlawhtling lo tih chu ni tin thil thleng hi evidence tha tak a ni thung.
ZPM sawrkar hian sawrkar hmasa pahnih tih theih loh tih theih tumin kuhva buaina chinfel thuai tumin hma an han la nghal rap rap a, mahse, eng an ang thei bik lo. ‘Kuhva check gate’ te siam a ni a, mahse, Vairengte chhehvela kudam 71-ah kuhva bag 9635 hmuhchhuah a ni a, an veng a, an veng hneh lova, ruk chhuah a la ni zui. Eng vangin nge state chhunga kuhva veivak mai mai pawh kan dan beh theih tak reng reng loh a, kudam pawh kan ven hneh tak loh? Hei hi kan ti thei lo tak tak nge, kan ti thei reng a, mahse kan ti duh lo zawk? A tlawmthlak ta hle.
Mizoram zim te, kawngpui pawh tlemte awmnaah hian dan kalh kuhva chu hmun tin hmun tangah a vak darh a, Mizoram chhunga kuhva chingtute eizawnna a rawn bawh bet a, kuhva phur lirthei a kang hluah hluah reng bawk. Law enforcement lama kan hniamzia a lang tel bawk.
Mizoram kuhva chingtute hian state dang atangin cheng vaibelchhe tel takmeuh meuh sum an hailut thin a, dan kalha foreign kuhva chawkluhin tunah chuan a rawn bawh bet a, hei hi Mizoram economy rawn beitu a ni tih lam hi kan chhut duh lo em maw ni tehreng ni? A tawp thei reng reng lo hi, tlawmthlak tak a ni!
Thil harsa tak a awm lo, rin ngil pawrh a, chu rin ngil chu zawh zar zar a, kawng laka lo daltu lungtum awm apiang thenfai kha a ni mai. Chu chu eng vanga la ti thei der lo nge kan nih, tih hi zawhna pawimawh ber a ni.