Kum 100 chuang hnuah Indopui I-naa lawng pil hmu chhuak

Kum 100 chuang hnuah Indopui I-naa lawng pil hmu chhuak
Indopui I-na hun laia pil ta, Royal Navy indo lawng chu kum 100 chuang hnuah tui chhung lut miten North Sea-ah an hmu chhuak leh.
HMS Nottingham hi Scotland vaukam atanga mel 60-a hlaah khawvel pum huapa UK leh a chhehvela lawng chhia leh pil ta awmna zawn hna thawktu, ProjectXplore kaihhruai tui lui mi 10-ten an hmu chhuak a ni.
German tuihnuailawng atanga kah chhuah torpedo hmangin August 19, 1916 khan feet 457-a sei indo lawng hi a chuang mi 38 nen tihpil a ni.
Tuna an hmuhna hi tui chhung metre 82-a thukah a ni a, ProjectXplore-in thla hmasaa an hmuh chhuah hma zawng hi chuan a chin hriatna reng reng a awm tawh lo a ni.
A hmutu team hian a lawnga a hming inbel, a len zawng, a hmanrua leh a dinhmun (condition) atangin ‘rinhlelh rual lohvin’ HMS Nottingham ngei a nih thu an sawi a, beih a tawh dan nia sawi zawng zawng nen pawh a hmelhmang leh awm dan chu a inrem thlap niin an sawi.
Tui chhung lui mite hian zanriah eina thleng, Royal Navy blue crown emblem inchhut kaina bakah thuziak pawng (emboss)-a ‘Nottingham’ tih pawh a mei lamah a awm tih an sawi.
HMS Nottingham hi enthlak hna a thawh laiin lawngchawlhnaa a ding chu vawi thum kah fuh a ni a. Kah a nih hma lawk zing lamah a awmna hnaiah hian German U-boat hmuh a ni bawk a, thawktute chuan sangha manna lawng tenau deuh chi emaw tiin an lo ngaihsak lo a ni.
Captain, officer 20 leh thawktu dang 357 chu Royal Navy destroyer pahnih hmanga chhanchhuah hman an ni.
A pil hnuah hian a awmna hriat tum hian tum eng emaw zat zawn hna lo thawh tawh thin a ni a, an la hlawhtling ngai lo.
ProjectXplore hian September, 2024 atang khan an zawng ve tan a, lawng veivahna chhinchhiahna, telegram leh chart hrang hrang ena zirin tha tharin an zawng veleh ta a ni.
April thla khan tuna an hmuhna lai vel hi sonar camera hmangin an dap a, lawng keh chhia, a len zawng, a awm dan leh a inhun dana HMS Nottingham atng tak hi an hmu ta a ni.
Thla thum hnuah tui chhungah hian uluk zawka luhchilhin an dap a, an lawng zawn ngei chu a ni tih an finfiah thei ta a ni.