Kum 61 chhunga an bialtute pafa hming lang ta lo

An pafain an inthlak a, an pafain bial ngai an
awp char char – kum 61 chhung! Chutiang chu ram dangah pawh sawi tur an vang ngawt ang.
1962-ah, district council hun laiin Hari Kristo Chakma chu MDC-ah a tling a, 2018-ah Nihar Kanti Chakma a tling. Pafa an ni a, 1962 atanga 2018 inthlan thleng hian an pafa hian bial ngaiah an tling. 2023-ah erawh Nihar Kanti Chakma hi a vanduaiah a tang ta.
1962 leh a dawt leh inthlanah Hari Kristo Chakma hi Tlabung leh a chhehvel, Circle 17-ah a tling a, 1972-a UT inthlan hmasa berah tlingin MLA a ni nghal. Chumi hnu chuan inthlan apiangin a tling a, vanduaithlak takin 1998 October ni 6-ah a boral. Chumi kum chu inthlanpui neih kum a ni a, 1998 kum tawp inthlanah a fapa Nihar Kanti Chakma a tling ve leh nghal. Hemi hnu-ah Nihar-a hi a tling ta zel a, 2008-13 chhung khan minister a ni. 2013-18 leh 2018-23-ah pawh MLA a ni a, 2023 inthlanah erawh a tling ta lo.
“Lung a leng khawp mai a. 1962 atangin ka pa nen bial kan lo enkawl a, tunah chuan kan awl ve dawn ta a,” Nihar Kanti Chakma chuan a ti a, “Ka pa hun lai phei kha chuan thil a harsa em em a. Bial a zau a, development a awm lo a, rambuai lai a ni bawk a. Chuti chung chuan harsa takin a enkawl a, Congress sorkar-ah khan development a awm ta a, MNF pawhin development hna an thawk a,” tiin a pa nena an hun lai chanchin a sawi.
Politics-a luh a tum ngai lo tih a sawi a, a graduate hlimin Tuichawng-a an middle school-ah headmaster tur graduate an mamawh a, chuti lo chu deficit status-ah an awm thei dawn si lo a, tlawmngaiin a lut a, deficit an hmuh veleh a chawl leh. Chumi hnuah CADC-ah officer a ni thei dawn a, mahse a pa a boral tak thut avangin, inthlana ding turin an sawm a, a pa sulhnu chhui turin thu a titlu ta a ni. Chu chu kum 29 a nih lai a ni.
A tling a, a tling chhunzawm zel. A pa ang bawkin hneh theih loh tura ngaih hial a ni thin.
“Ka pa tih dan ka copy chu, mi zawng zawng ang khatin a en a, chu chu ka ti ve. Tu mah ka en hrang lo,” Nihar-a chuan a ti.
“Mi zawng zawng ka hria. Ka dik famkim lo a, dik lohna ka nei ang. Mahse mi zawng zawng ka hria a, mi zawng zawng ang khatin ka en,” a ti.
Fapa pakhat leh fanu pakhat a nei a, a fapa hi politics-a lut ve lo tura a duh thu sawiin, “Ka fapa chu ‘Ti ve suh,’ ka ti. Keimahni kan ni rei tawh a, a tawk tawh ka ti,” tiin a fapain politics luh chilh ve lo se a duh thu a sawi.
“Politics chu a buaithlak em mai. Vawiinah mi hi an fel a, a tukah an sual leh a, vawiinah fel min ti a, a tukah sual min ti leh a,” a ti a, a puih thinte pawhin amah an bei nia sawiin, buaithlak a tih thu a sawi.
An pafaa hei chen bial an enkawl thei hi vannei a inti a, “Kan vannei a ni, malsawmna kan dawng a ni,” a ti. “A tawk tawh a ni ang,” tiin a tlak chungchang a sawi a, “Sawi tur chu a tam a, mahse mi dang an awm ve a hun tawh a ni ang,” a ti.