Permit neilo lung late avangin sawrkarin revenue a hloh nasa

Permit neilo lung late avangin
sawrkarin revenue a hloh nasa
Dan ang taka phalna nei lo, stone quarry nei an tam avangin sawrkara sum an chhunluh tur chhunluh loh a tam a, royalty atanga an hmuh tur hmuh loh zaa 50 chuang a tling hial tih sawi a ni.
Mizoram Quarry Owners Association sawi danin, quarry permit nei loa lung la leh her (rora leh stone dust) an tam a, dan ang tak chuan mining check gate paltlang turin Form ‘O’ neih a ngai a, an nei si loa, engtin nge gate an paltlang chu an hre bik lo tih an sawi.
He form ‘O’ ah hian an thil phurh cubic meter dik tak ziah a ni a, driver copy leh a leitu (customer) copy tur, copy hnih chu association atang hian lakchhuah a ngai a, chumi nei si lo, lung/ rora adt. pe an tam hle tih an hriat thu an sawi a ni.
Mimal mai niloin, contractor zingah, an contract hna thawhna atan chiaha lung la leh siam thei zingah pawh phalna pek an nih dan pawnlama zuar thin an awm tih sawiin, chu’ng zingah chuan Maubuang rama inbun SLT Company pawh an tel tih an sawi.
In sa, bang rem leh hna dang nei zingah NGO, kohhran leh sawrkar department atang ngei pawhin, hetianga dan ang ni loa lung la leh her hi an dawr nasa tih Quarry Owners Association hruaitute chuan sawiin, dawr lo ngam turin an ngen tih an sawi a ni.
Tunhnaiah sawrkarin lung halna (explosive) thahnem tak an man thin a, heng an man thenkhat hi quarry nei, lung la lo, mah se permit nei tho si atangin a ni fo tih an sawi a. A nih dan tur anga quarry-a lung halnaa hman chuan an permit neih atanga an lak theih zat hian a daih meuh lo zawk tih an sawi.
Zawhna chhangin association hruaitute chuan, Mining department hotute nen pawh hma lak dan tur an sawi fo tawh a. Hotu lam inthlak reng an nih bakah thawktu indaihlohna avangin hma lak a chak lo hle tih an sawi a. Chief minister an sawipui tawh bawk a, hemi mite avanga sawrkarin royalty a hmuh tur ang let khat aia tam mah a chan phah thute an thlen tih an sawi a ni.