Legislators Conference-a tel Speaker-in Mizoram House tlawh

National Legislators Conference hmanga Mumbaia kal Mizoram Assembly speaker Lalrinliana Sailo chuan Inrinni khan Mumbai Mizoram House a tlawh a. MLA Nihar Kanti Chakma leh Dr BD Chakma ten an tawiawm. Deputy resident commisioner H Lalruatliana’n lo dawngsawngin damlo awmte nen an inkawm a ni.
Speaker Lalrinliana Sailo chuan kum 2005-a Mumbai Mizoram House hawn chu hruaitu hmasaten theihtawp an chhuah vang a ni, tiin, ram tana an thahnemngaihna chu chhuanawm a tih thu a sawi a. Mizoramah cancer vei an tam avangin Health minister a nih laiin cancer vanga thihna tihniam turin theihtawp chhuah a nih thu leh hemi atan cancer tamna ram Japan-ah Mizo surgeon pahnih tirh an ni a. An lo haw hnuah cancer enkawl tur phaia kaltir thin pawh nasa takin a tlahniam tih a sawi. Cancer enkawlna kawngah natna hmuhchhuah hma a pawimawhin hemi atana early detection drive kalpui tura hmalakna chu beisei anga a hlawhtlin loh vangin pawi a tih thu a sawi bawk.
Mumbai Mizoram House hnathawkte chu damlote tana an inpekna leh Mumbai-a Mizo awmten harsatna an tawh changa an buaipui thin danah fakawm a tih thu a sawi a. Milian mite thliar loa damlo te an hmasak dan indawta accomodation pek an ni thinte chu tha a tiin mite tana malsawmna lo ni zel turin a chah. Damlote tan a tul tula hman atan Damlo Welfare Committee hruaitute hnenah sumfai a hlan a ni.
Deputy RC hian House dinhmun leh accomodation indaihlohna avanga harsatna an neihte, helai buildinga cheng ve hnamdangte leh Mizote inkara harsatna neih thinte a lo thlen a ni.
Mumbai-a neih, ni thum awh National Legislators Conference ni hnihna, June 16-ah Lok Sabha speaker Om Birla leh Maharashtra deputy chief minister Devendra Fadnavis ten an telpui a. Thupui hrang hrang hmangin hmun 40-ah a rualin parallel session neih a ni. Heng session-ah hian legislator-ten an awmna state kalphung tha leh chhuanawm an neihte an sawi a. Mithiamte nen ram dang tih dan tha entawn tlak leh legislator-te tana ngaihtuah zui tur pawimawhte sawi leh zir ho a ni.
Mizoram Assembly speaker hi “Commendable Legislative Practices” tih thupui zirhona session-ah special guest niin, kalphung tha kan neihte a sawi a. mipui rorelna democracy a taka grassroot level atanga kalpui dan, remna leh muanna boruak vawnhim a nih dan, Assembly chhunga roreltute awmdan mawi leh House zahawmna vawnhim kawngah, India ramah Assembly rorelna pumpui live telecast hmasatu state kan nih thu te a sawi a ni. Mizoram Assembly rorelna live telecast-a tih chhuah chu state dang MLA-te pawhin entawntlak an tih thu an sawi a ni.
Mizoram atang hian speaker bakah MLA 6 an tel a ni.