Lemziakah naupang intihsiak

Lemziakah naupang intihsiak
Mizoram State Council for Child Welfare chuan zirlaite tan lemziak intihsiak a buatsaih a. Zirtawpni khan lawmman sem a ni.
Kumtina a tih angin Mizoram State Council for Child Welfare hian National Painting Competition a buatsaih a. Tun tum hi a vawi 15-na a ni. Lemziak/ cheimawi inelna hi group 4-a then a ni a; kum 5-9 inkar, kum 10-16 inkar, vohbik naupangah kum 11-18 inkar leh kum 5-10 inkar tan siam a ni. School 19 atangin naupang 181 an tel.
Group 4-a titha berte hi Lalzarliani Hmar Award (Rs 5000 leh citation) pek an ni a, a titha dang group 4-a mi 4 theuh chu Honourable Mention Award (Rs. 1500 leh citation) pek an ni.
State level-a pakhatna atanga pathumna hi Indian Council for Child Welfare New Delhi-ah national level-a inelna atan an lemziak hi thawn a ni anga, chuta lawmman dawng pha chu New Delhi-ah an kal lam leh haw lam, ei leh in tumsakin lawmman dawng turin an kal anga, kum 18 an tlin thleng scholarship pek an ni dawn a ni.
Lawmman semtu MJA Gen. Hqrs. president C Lalrambuatsaiha chuan hnam fing leh changkang apiangin lemziak an ngaihlu a, lemziak thiamten ngaihsan an hlawh, tiin, “Khawvel mi ropuite chenna in hi lemziak tel loin a famkim loa, a cheimawitu leh a tihlu zualtu chu a chhunga lemziak mawi tak tak, maksak tak tak te a ni. President chenna Rashtrapati Bhavan, Governor in, five star hotel pawh lemziak hmanga cheimawi a ni thin,” a ti a. Lemziak lama tui zirlaite chu an talent pho chhuak zel tur leh hma sawn tum zel turin a fuih.