Lengpui Airport enkawl dan turah central ministry nen kan bawhzui – AAI chairman

Chief minister Lalduhoma chuan Lengpui Airport enkawl dan turah Airport Authority of India (AAI) lamin rawtna a la neih loh avangin an nghak mek niin a sawi a. Hemi chhang hian AAI chairman chuan central ministry hotute nen an bawhzui a, September thla laihawlah chuan rawtna an thlen theih an ring tih a sawi. Arunachal Pradesh khawpui Itanagar-ah sawrkar laipui Ministry of Civil Aviation bultumin North East Region Minister’s Conference on Civil Aviation neih a ni a. Mizoram chief minister Lalduhoma pawh a tel. Union minister for Civil Aviation Rammohan Naidu Kinjarapu leh Ministry of Civil Aviation hotute, Airports Authority of India chairman, Civil Aviation director general, Ministry of Civil Aviation joint secretary Asangba Chuba Ao leh officer dangte an tel.
Chief minister chuan Lengpui Airport enkawl dan turah Indian Air Force chuan an rawtna an thehlut tawh a, Airport Authority of India (AAI) in rawtna a la nei ve lo thung a, rawtna mumal tak an neih hun an nghah mek tih a sawi.
Hemi chungchangah hian AAI chairman Vipin Kumar chuan Ministry of Home Affairs leh Ministry of Civil Aviation nen an sawiho a, an bawhzui mek a, September thla laihawlah chuan rawtna mumal tak an thlen theih an beisei tih a sawi.
Chief minister hian AAI hnenah airport ram hi Mizoram Land Revenue Act 2013-in a phal angin, lease-a pek theih a ni a, Mizoram sawrkarin airport atana sum tam tak a lo sen tawh chu AAI-in an la dawn a nih chuan reimburse ve turin an beisei tih a sawi a ni.
Conference-a sawi angin, Regional Connectivity Scheme hnuaiah kumin October atangin Mizoram-in Pawan Hans helicopter service a neih belh dawn a. Aizawl to Champhai, Aizawl to Lawngtlai, Aizawl to Parva bakah Aizawl to Silchar leh Churachandpur a thlawk dawn. Aizawl to Parva route hi a hmangtu an tam tawk dawn loh avangin route danga thlak turin chief minister hian Union minister hnenah a thlen nghal a, hei hi Ministry of Civil Aviation chuan an lo ennawn leh tur thu an hrilh. He scheme hnuaiah Mizorama helicopter service pawh tun aia ti tam lehzual tura ngenna chief minister hian a thlen bawk.
Hmarchhak khawpui dangte nena khaikhinin Kolkata – Aizawl thlawhna chuan man a sang fal hle, tiin, mi tam zawk ban phak a nih theihnan thlawhna chuan man tlawm zawk kan mamawh thu leh Aizawl – Kolkata leh Aizawl – Delhi thlawhna thlawk zat pawh tihpun kan mamawh thu chief minister a sawi a. Union minister leh a team-te hian IndiGo an lo biak tur thu an sawi.
Summit hawnnaah hian Union Minister of Civil Aviation leh Arunachal Pradesh chief minister Pema Khandu ten thu an sawi a. Ministry of Civil Aviation hotute nena one on one interactive session neih zawh hnu in Aviation industry-a company hrang hrang nen chief minister hi an inkawm a. GAD Aviation Wing director Lalrohlua’n a tawiawm a ni.
Conference-a CM thu thlen dang:
8 Lunglei district leh Champhai district-ah Greenfield Airport mamawhna a sang hle a, an neih theih chuan mipui tam takin an chhawr tangkai dawn a, India ram laili nena kan inzawmna a thuk sawt dawn tih a sawi.
8 Greenfield airport pahnih dinna tura hmalakna hmasa atan pre feasibility study nei turin DoNER ministry-ah an thehlut tawh tih a sawi a. Union minister hian Ministry of Civil Aviation-ah rawtna thehlut zawk turin a rawn a, thla khat chhungin pre feasibilty study neih a nih tur thu a hrilh.
8 Tui chunga tum thei chi thlawhna (seaplane) service tir theihna tur hmunhma pathum pali emaw vel Mizoram-in a nei tih hian a sawi a. Union minister chuan Ministry of Civil Aviation-ah proposal thehlut turin a hrilh. MoCA hian pre feasibility study an nei zui dawn a ni.
8 Mizorama loneituten horticulture product tha tak tak an tharchhuak hnem tawh a. Rang zawka phurhchhuahna a awm loh avangin state pawna hralh theihna remchang an nei mang thin lo. Lengpui Airport-ah cargo hub leh cold storage facility a awm chuan thlai tharlam ber ber awlsam takin a phurhchhuah theih dawn a, hetiang hmunhma din theih dan tur hi Union minister leh a team-te hi a sawipui. Union minister chuan AAI-in Lengpui Airport a lakchhawn hunah hei hi chu a kengtel thei dawn tih a sawi.