Live-a mipat hmeichhiatna hmangtute MSCW-in umzui

Mizoram State Commission for Women (MSCW) chuan tunhnaia Mizo hmeichhia nia ngaih pakhatin social media kaltlanga sex live video a tihchhuah thar, social media platform hrang hranga thehdarh chu an ngaimawh takzet a, ualau taka mipat hmeichhiatna hmang lai phochhuah leh thehdarh chu hmeichhe zahawmna tihbawrhbanna nasa tak a nih avangin suo moto-in case ziahluh a ni tih an sawi.
MSCW sawi danin, social media video viral atanga a lan danin he hmeichhia hi instagram-ah chuan ‘pui_puii_chhakchhuak’ aka ‘zolanu’ tih a ni a; sex video hi sum hmuh nan a hmang nia ngaih theih turin a live sex video en duh tana man chawia en theihna a tlangzarh hmasa nia hriat a ni. Chumi hmang chuan ualau takin, man chawitute hmuh theih turin mipat hmeichhiatna mawi lo taka hman zui niin a lang a, chu thil chu social media platform hrang hrangah a darh ta a ni.
‘Hetiang thil hi a pawi hle a, dan palzutna lian tak niin, hetianga mipat hmeichhiatna hmangtu leh a hmanpuitu bakah social media account/ platform lo hmantirtu (mihran an nih chuan) te lakah hian thubuai a rang thei ang bera ziaklut a, chhuizui ngai leh man ngaite lakah dan anga hma la zui thuai turin Superintendent of Police, Cyber Crime Aizawl hriattir a ni a. Hmalak dan kimchang hi he order tihchhuah a nih atanga ni sarih chhungin MSCW hnenah ziaka hriattir leh turin SP hi beisei a ni,’ a ti.
Mipat hmeichhiatna chungchang social media-a vawrhdarh leh thawn darh hrim hrim hi dan palzutna lian tak a nih thu leh na taka hrem theih a nih thu sawiin, hetiang video hi thawn darh lo tur leh kan kawl sa pawh paih turin mipui a ngen tih MSCW chuan a sawi.
Social media kaltlanga sex video tarlangtu leh hmangtute lakah hian MSCW chuan suo moto case a lo siam tawh thin a, chumi hmang chuan Mizo hmeichhia, chutianga sex video siamtute chu police-in manin, lung inah khung an lo ni tawh a, case chhuizui lai pawh a awm tih an sawi a ni.