Luangmualin hmeichhe final an lut

Luangmualin hmeichhe final an lut
Chanchin thar neih belh zelin inrinni zanah Luangmual chuan 3-0-in Bungkawn an hneh a, Tata SK 712 Pro Volleyball League hmeichhe final an lut.
R. Dengthuama Indoor Sta-dium, Mualpuiah Luangmualin an la tawn ngai loh semi-final an khel a, a tir lamah point kuain hniam hman mah se Nipa Barad chuan team fuihphurin mar takin hma lam an pan tluan a, 25-22, 25-16, 25-20-in an chak.
Gujarat tleirawl Nipa chuan vawi 24 vaw tlain point 11 a hloh a, D3 Business Player of the Match lawmman dawngin mimalin a filawr. Luangmual Mizo player langsarte’n tum dang an pha lo a, Lalmuanpuii’n point ruk a hmuh aia point khata tam a hloh.
Chuti chungin Luangmual tan tawnhriatah an tluk lo tih loh team leh mimal inelna kawng hrang hrangah Bungkawn aiin an chungnung a, Pro Volleyball-a an tel vawikhatnaah champion turin rin an hlawh telh telh.
An khelh hmasak ber atanga vawi ruk an chak zawnna niin, derthawng loin an bitum apiang an hneh zel a, Ningani zanah an hneh tawh ve ve Kanan leh Bethlehem Vengthlang chak zawk nen final-ah an intawng ang.
League-ah set la loin Bungkawn an tlawm a, an hmabak khirh viau mah se inelna sangah inthununna tha nen tlangnel takin bul an tan.
Set la thei turin 19-10-in hma an hruai tawh a, a tir lama chefuh tawk lo kum 18 mi Nipa chuan tum nga hlap tla zawnin Hmingthazualin a vaw tla bawk a, Luangmualin an hnaih chak hle.
22-20-in Bungkawn an sang zui leh naa RK Lalfakmawii’n vawi hnih net a bel a, Luang-mualin point li hmu zawna chak tlang thei dinhmuna an awm laiin Bungkawn innghahna pawimawh F. Lalparmawii’n court pawnah a vaw chhuak.
League-a an inkhelh tum khan mimalin F-i a chetha a, khel tha bera thlan a ni. Tuntumah point 13 hlawh chhuak mah se a hloh zat nen a intluk chiah a, Bungkawnin danglamna siam thei leh rin ngama vaw tla thei midang an kawl lo a, an tuar.
Set hnihnaah Luangmual nulate an chungnung zawk a, set thumnaah Bungkawnin beiletin 18-17, 19-18-a sang zawk an nih laiin anmahni tihsualah point an hloh zel. Lalhmingtani’n a vuak kai loh hnuah 20-19-in Luang-mualin an kalsan a, Bungkawnin point khat chiah hmuh belhin an tumpuite an el zo tawh lo.
Season liamta lamah khan Bungkawnin uiawm takin champion thei tura hun tha an bawhbelh zawn a, Pro Volleyball hnuhnung pahnih – 2019 leh 2022-ah league-a sang ber ni chungin final-ah an tlawm zawn.
Tuntumah palina ni chungin knockout round an lut hram a, a zawna vawi thum final khelh an tumna an puitlin thei ta lo a ni.
Inrinni match-ah hian D3 Business Fan’s of the Night
atan C. Lalchhuanawma (Luang-mual) thlan a ni.
Zanin dar 8 atang hian a hmun ngai R. Dengthuama Indoor Sta-dium-ah hmeichhe semi-final hnuhnung zawk Kanan leh Bethle-hem Vengthlangin an khel ve leh ang a, mipa lam an awl thung ang.