Lungalhthei la lut tlem, hman nawn theih energy siam pung

India-in lungalhthei a lak luh chu January-May chhung khan kum li chhunga a tlem ber tum a ni a, hei hi tual chhung thar chhuah a pun nasat avang leh hman nawn thei (renewable) energy siam chhuah a pun zel vang a ni tih commodities consultancy BigMint chuan a sawi.
May thla thleng khan India-in lungalhthei a lak luh hi ton maktaduai 65 a ni a, kum khatah a lak luh thin atanga chhutin hetih hun chhunga a lak luh 12% zetin a tlahniam niin consultancy chuan a sawi.
Khawvela lungalhthei la luh tam pahnihna, India chuan thil lak luha innghah tihtlem a tum a, kuminah hian power siam chhuah atana hetiang hman hi 30% tala tihtlem a tum a ni.
Ram chhunga lai chhuak hnem bertu, Coal India chuan El Nino-in a thlen tur khaw awm dan tur avangin electric hman a pung dawn a, hei vang hian an hnuaia mite chu thar chhuah tipung turin a lo ngen tawh a ni.
Middle East-a buaina chhuak vanga lungalhthei lak luh man sang leh bungraw phurh man sang pawhin thil lak luh a tichhe hle niin BigMint chuan a sawi.
January-May thla khan power siam chhuah zawng zawng chu kum hmasa aiin 5%-in a pung a, hman nawn theih chi bik phei chu a pung nasa zual a, hle 22% zetin a pung niin BigMint chuan a sawi.
India-in power a mamawh san lai ber, electric mamawh a san ber hun laiin May 21 khan a inchhut lawk aia tam, gigawatt 270 zet hman a ni a, hei hi khaw lum takin ram a tuam vang a ni.
Asia chhim lam ramah hian power mamawhna hi 11.2% zetin a pung a, kum hnih chhungin May thla kha mamawh a san lai ber niin sorkar laipui hnuaia grid regulator Grid-India data chuan a tar lang.
Thermal power siam chhuah chu thla hmasa khan kum kal ta aiin aiin 10%-in a pung a, May, 2024 hnua a san ber a ni a, siam chhuaktuten darkar tin electric mamawh phuhruk nan an pek chhuah an tihpun vang a ni pakhat.
Thla khat chhung khan India-a hman nawn theih power siam chhuah chu kum hmasa aiin 29.31%-in a pung a, kilowatt-hour tluklehdingawn 27.58 a ni a, hei hi ramin power a siam chhuah zawng zawng atanga 17.9% a ni tih Reuters-in ni tin sorkar chhinchhiahna a zir chiannaah tar lan a ni.