Manipur chief minister-in an state buaina kaihhnawiha Mizoram chief minister phone-a bia a, ngenna a thlente chu Mizoram leh Zohnahthlakte tan him lo a nih chuan a ngenna pawmpui ngawt lo turin Mizoram CM an ngen tih Congress party chuan an sawi.
MPCC thuchhuak chuan, kumin May 3 atanga Meitei-ten Manipura Zohnahthlakte chunga buaina nasa tak an siam tirh lam khan Manipur CM N Biren Singh hian CM Pu Zoramthanga be duh loin, a phone call pawh a chhang lo a. Rapthlak tak leh rawva taka Zohnahthlakte chunga an chet hnua phone call hmang maia inbiakna kalpui a ni leh, Manipur CM ngenna ang ang lo pawmpui duak duak chu Mizoram tan him loah an ngai tih sawiin, ‘Pu Zoramthanga hi Mizoram leh Mizo hnam zahawmna humhim tura Manipur CM bawl kuala awm lo turin kan ngen a ni,’ a ti.
Pawnlawi taka state pahnih chief minister-te an inbiak mek laia All Assam Manipuri Youths’ Association (AAMYA) in rorellai MNF party a vau ngam chu a phenah Manipur CM a awm an ring tih MPCC hian a sawi a. AAMYA-in June 23 atanga Assam leh Mizoram inkalpawhna kawng tiamchin awm loa danchah an tum, HSA (Hmar Students’ Association – Assam Hills) leh NCHISF (NC Hills Indigenous Students’ Forum) hmalakna vanga thulh a ni chu lawmawm a tiin, heng pawl pahnih hmalakna chhuanawm a tih thu a sawi a ni.
Tunlaia BJP sawrkar chet dan chu sakhaw dang vuantute leh hnam tenau zawkte chimral tumna tih a chiang tih MPCC hian sawiin, ‘Hei hian India democracy lungphum a sawinghing mek a. Hei vang hian Mizoram tana kan thawhpui NGO te, political party leh kohhran zawng zawng pawhin kan ram, kan hnam leh kan sakhua chimral tumtu leh nekchep tura hma la mektu BJP hi nasa zawka huaisen taka do zel turin kan ngen a ni,’ thuchhuah chuan a ti.
Manipur CM thu pawmpui ngawt lo turin CM kan ngen – MPCC
Get real time updates directly on you device, subscribe now.
Next Post