Danin a phut anga rualbanlote dinhmun endik leh an hman tangkai theih tur certificate pekchhuah chungchanga hriat tur tul inhrilhhriatna chu Thawhtanni khan Aizawlah neih a ni a, vawiinah chhunzawm a ni ang.
He hun hmanpuitu Health & Family Welfare minister Dr R Lalthangliana chuan Mizoramah a vawikhatna atan hetiang inzirtirna buatsaih a ni chu lawmawm a tih thu leh chhunzawm zel chi nia a hriat thu a sawi a. Rualbanlote enkawlna lama doctor thiam bik mamawhna a nasa hle tih sawrkarin a hria a, tin dinhmunah lak belh thei rih lo mah se, doctor kan neih sa te atangin tih dan ngaihtuah a ni dawn tih a sawi a ni.
Rualbanlote chungchangah anmahni leh mipui nawlpuite hriat tur inhrilh uar a ngai tih sawiin, a bikin thingtlang lamah disability certificate nei lo an tam a, sawrkar hnena bengdar vuah tur dil dawn leh thil dang dangah he certificate tel lo chuan a tih theih si loa, disability survey neih pawh a tul hle, tiin Health minister hian a sawi a. Chutih rualin certificate pek chhuah kawngah fimkhur a ngai a, a ni lo zawnga hmang mai duh an awm theih avangin he workshop hian an hmalakna turah awmzia thui tak a neih a beisei tih a sawi.
Workshop hi NIEPMD Chennai leh Mizoram PwD commissioner office tangdun buatsaih a ni a. Rights of Persons with Disabilities Act 2016-in a phut anga rualbanlote dinhmun endika certificate pek chhuah chungchang zir a ni ang. National Institute for Empowerment of Persons with Multiple Disabilities (NIEPMD) atanga rawn kal mithiamten zirtirna an pe a, Mizoram sawrkar hnuaia medical officer 40 vel leh an staff-te an tel.
RPwD Act 2016 hnuaiah hian rualbanlohna chi hrang hrang 21 chhinchhiah a ni a. Heng rualbanlohna neite certificate pe tur hian hetiang lam kaihhnawih doctor kan neihsa te hian an daih lo nasa a, hetiang workshop neih hi a tul avangin buatsaih a ni.
Mizoramah rualbanlo 16000 vel chhinchhiah an ni tawh a, khawpui leh thingtlang khaw hrang hrangah la chhinchhiah loh tam tak an awm. State sawrkar hnuaiah rualbanlo (PwD) qouta-a hna hmu mi 100 vel an awm tawh.
Rualbanlote dinhmun endik turte inzir
Get real time updates directly on you device, subscribe now.