Manipur MP in K. Vena khak

Manipur MP in K. Vena khak
Manipur atanga Rajya Sabha member Leishemba Sanajaoba chuan Mizoram MP K. Vanlalvena chu an ramchhunga Meitei leh Zohnahthlakte inkara buaina chungchangah inrawlh lo turin a hriattir.
Manipur MP chuan hnam hnih buaina chungchangah inthendarh chungchang rawtna lo siam chhen lo turin K. Vena chu a ti a, Manipur thil thlengah anmahni chu an inchingfel ve thei niin a sawi.
MNF party atanga MP thlantlin K. Vanlalvena hian Manipur chief minister N Biren Singh chu paihthlak a, president rule-a Manipur dah a duh thu hi lo sawi tawhin, hei hi mi 250 chuang zetin nunna an chan phah tawhna Manipur buai tihrehna tur hmahruai tha ber niin a lo sawi tawh thin a ni.
MP Sanajaoba chuan, ‘Ka thian, i ramri pel lo la, khawngaihtakin i state chhung kha hrechiang phawt rawh. Manipur issue-ah rawn inrawlh lo la, thenawm tha tak nih rawh,’ tiin social media platform pakhatah a tarlang.
Mizoram MP K. Vena hian Manipur buaina chungchang hi chinfel dan tur kawng hnih awmin a hriat thu tunhnai khan a lo sawi tawh a, CM ban leh buaina bul ber Meitei leh Zohnahthlakte chu tlang leh ruama awm an nih avangin rorelna hran ve ve an neih a tul thu a lo sawi tawh a ni.