Zirtawp zing khan NBA Western Conference play-off final game ngana khelh a ni a, inkhel hmuhnawm takah Dallas Mavericks chuan a vawi li nan Minesota Timberwolves an hneh a, NBA Final an lut. Mavericks hian NBA final ah Boston Celtics an hmachhawn ang.
Final game li khelh tawhah 3-1 a hmahruai tawh Dallas Mavericks hian Timberwolves hnehin final luh chian ngei tumin tan an khawh a, final game 5-naah an khel tha hle. Final game ngana quarter hmasa berah point 16 zetin an chungnung nghal. Bul an tan that vangin an phur a, an khel tha zui hle nghe nghe. Point 16-a hma an hruai hnuin quarter hnihnaah an khel tha chhunzawm a, point 13 in an chungnung zui leh a, point 29 zeta hmahruai chungin chawlhlawk an hmang.
An hmahruaina a chhah tawh em vangin chawlhlawk hnu lamah Mavericks game a dul hret a, point an thawkchhuak pup pup tawh lo. Final luh beisei zui tura tlawm thiang tawh lo Timberwolves hian inlehthalna lian thlentir tumin thapui an thawh. Chungnung zawk nih tumin tan an khawh nasa bawk a, quarter thumnaah point 5 in an chungnung a, an inkar an tizim. Quarer thumnaa an chungnung hnuin quarter linaah point thumin chungnung zui leh mah se an khingpuite hi point 21 zetin an umphak lo. Dallas Mavericks lakah point 124-103 a tlawm in, fina an lut zo ta a lo a ni.
Final lut chiang tura Minesota Timberwolves an hneh nawn leh tum hian Dallas Mavericks tan Luka Doncic leh Kyrie Irving ten point 36 ve ve an thawkchhuak a, an chetha dun hle. Timberwolves tan Anthony Edwards leh Karl-Anthony Towns ten point 28 ve ve thawkchhuak bawk mah se an team tlawm tur an chhan thei ta chuang lo a ni.
Tarlan tawh angin Dallas Mavericks hian NBA Final-ah Boston Celtics an hmachhawn zui leh dawn. An khingpui tur Boston Celtics hi NBA-ah vawi 17 an champion tawh a, Los Angeles Lakers nen champion ngun ber an ni dun mek. 2024 final-ah Timberwolves an hneh a nih chuan NBAah vawi 18 champion in, NBA a champion ngun ber record thar an siam ang. NBA Final 2024 hi June ni 6 atangin khelh tan a ni dawn a. Game 7 khelh tur a ni ang a, game li la hmasa zawk zawk an champion ang.
Mavericks in NBA final an lut
Get real time updates directly on you device, subscribe now.
Next Post