French Open 2024 – Djokovic-an hma lam a pan zel

French Open 2024 khelh mekah champion lai Novak Djokovic chuan champion nawn leh turin hma lam a pan zel. World No. 1 Djokovic hian ningani zana a khingpui Roberto Carballes Baena chu set hloh lova hnehin third round a lut, Ningani a inkhel dangah Rafael Nadal hnehtu Alexander Zverev chak nawn lehin, third round a lut ve bawk.
Champion lai Djokovic hian Court Philippe Chatrier-ah bul a tan tha lova, a khingpui Roberto Carballes Baena lakah a serve hmasa ber a hloh nghal. Game hloh hmasa zawk a nih hnuin a insiam tha thuai a, a khingpui a break let nghal. Break a neih hnuin derthawng tak chungin game a la hram hram zel a, break nei nawn lehin, set la hmasa zawkah a tang.
Set khatna a lak hnuin Djokovic a khel tha chhunzawm a, a hawikir tawh lo. Game khat chauh hloh chunga set hnihna a lak hnuin, set thumnaah game hnih bak a hloh lo zui leh a, 6-4, 6-2, 6-2 a hnehna changin, third round a lut ta a ni. Djokovic hian kum 19 chhung zet chu Grand Slam-ah third round a lut zawn tawh. Grand Slam-a chak tam lamah Roger Federer record a hnaih zel a. Rolland Garros-ah vawi khat a chak a, fourth round a lut a nih chuan Grand Slam a chak ngun ber Federer record 369 a tluk ang a. Record thar siam theihna hun tha tak a nei zui ang.
Grand Slam a vawi 24 champion tawh Novak Djokovic hian fourth round-ah 7-5 6-1 6-4 a Gael Monfils hnehtu Italian Lorenzo Musetti a hmachhawn zui leh ang.
Ningani a inkhel dangah Olympic champion Alexander Zverev chuan a khingpui David Goffin chu 7-6 (7-4) 6-2 6-2 in a hneh a, third round a lut. Zverev hian French Open a khelh hnuhnung pathumah semi-final a lut vek a. Inelna neih mekah champion tura rinkai ber zinga mi a ni. Rolland Garros-ah hneh theih loh ang maia inlan thin Rafael Nadal hnehin bul a tan a, inrintawkna sang tak nen hma lam a pan mek a ni.