MBBA Buatsaih D League leh Womens League Screening

MBBA Buatsaih D League leh Womens League Screening
Vawiin January ni 20 (Thawhlehni), 2026 atang hian February ni 6 (Zirtawpni), 2026 thleng awh tur D League leh Womens League screening tournament chu Hawla Indoor Stadium, Republic Vengthlangah khelh tan a ni dawn.
Mizoram Basketball Asociation (MBBA) hnuaiah hian Mizoram Super League (MSL) club pariat an awm mek a; MSL hnuaiah hian D League club pariat leh Womens club panga an inziak lut mek bawk a, tun tum inelna ah hian club pakhat an inlan dawn lo thung.
D League club pariat zinga tun inelnaa finalist club pahnih te hian MSL XI (March ni 3 atanga tan tur) atanga club pahnih tla (relegate) te hmunawl hnawh khatin, MSL XII an khel dawn a – tun tum intihsiakna hi a pawimawh dawn hle.
Tun season-ah hian MBBA lamin Season Opening tournament a buatsaihah MSL club pariat leh D League club pariatte hi an inkhel kual a, MSL club Khatla TBL in champion nomawi an chawi; MSSC Golden Jubilee MBBA Cup-ah pawh MSL club pariat leh D League club pariatte hi an inkhel kual a leh a, MSL club Chanmari BC an champion zui leh a nih kha.
D League club pariatte hi tun season-ah hian lo inkhel tawh hlawm mah se, eng ang chiaha lian leh hrawl nge an ni tih buk a har – MSL club te nen intihsiakna an beihho thin avangin! Tun inelnaah erawh hi chuan D League club pariatte hi patla pakhatah bukin an awm dawn a, hnam dang player-te an chawlut bawk nen – MSL kawngkapui kik hawnna remchang an nei cheu dawn bawk a, inelna hi a tir atangin a hmuhnawm dawn, anni club pariat tho atang hian Division 1 lamah a hnuai club pahnih an tla thla ang.
Tun season-ah hian MBBA Womens team lam hian Season Opening leh MBBA Cup intihsiakna pahnih an khel tawh a, Bungkawn LBA ten champion nomawi an chawi ve ve a ni; Bungkawn LBA hian MBBA Cup a zawnin kum thum zet an champion mek nghe nghe.
Hoops Mania Timeout
1. MBBA hian kumin January atang hian Hawla Indoor Stadium, Republic Vengthlang chu MSSC kut atangin inremsiamna fel tak hnuaiah a enkawl tan a, MBBA lam hian uluk taka cheithat hna bawhzui nghalin, hman hawh theih turin ruahmanna a siam mek bawk. Court booking duh tan MBBA puipa lam biak a theih ang.
2. D League-ah hian club tan hnam dang lakluh a theih dawn avangin senso a pung thut ang a, squad siksawi hrep a ngaih phah leh dawn bawk!
3. Tualchhung player kumtluana club tana thahnemngai taka lo khel a, inelna lo hmachhawn thinte tun inelnaah hian khel pha lo an awm ang – hnam dang player tun inelna chiah khel tura club in a lakluhte hian practice mumal pawh nei hman lovin intihsiakna an rawn hmachhawn leh thut ang a, team game mawi leh nalh tak aiin hnam dang player mila khelh a tul leh phah ang a, tualchhung basketball in chuti vakin hma a sawn phah lovang.
Thlirna dangah chuan hnam dang player D League club-ah an rawn luh belh hian inelna a ti tang ang a, tualchhung player nei tha bik club tan thapui thawh a ngaih phah dawn. Tin, tualchhung player discipline nei tha lo leh hmasawn lo tan squad an chan loh phah tur hi duhthusam a ni tel tlat. Hnam dang player tha khelhpui theihna ‘chance’ duhawm a ni a, a hlawkna tualchhung player tan a awm chiang sa – hei hi inkhel entute tan hlep hlang.

D League Team:
1. Chawnpui BC
2. Chaltlang BC
3. Champhai Boars
4. Champhai VT
5. Electric BC
6. Nursery SC
7. OPD Venghlui
8. Vanguard BC

Womens Team:
1. Team Alpha
2. Mission Veng Hotshots
3. Bungkawn lba
4. Mohicans

Vawiina inkhel turte
(Womens Team):

Hotshots v Alpha 5:30 pm
Bungkawn LBA v Mohicans 7:30 pm