Medvedev a tla ringawt

Australian Open 2025 khelh mekah ningani zan khan inlehthalna lian a thleng a, champion tura rinkai zinga mi Daniil Medevedev chu kum 19 mi Learner Tien hneh lovin a tla ringawt. Medvedev a tlak lai hian Novak Djokovic, Carlos Alacaraz leh Alexander Zverev ten hnehna an chang ve thung.
Australian Open-ah final vawi thum zet lo khel tawh Medvedev hian kum 2025-ah bul a tan tha lo viau a, first round-ah pawh harsa takin a chak hram tawh lo. Harsa taka first round a pal tlang hnuin harsatna a tawk zui leh a, World No. 121 Tien a hneh lo. Russia star Medevedev hian Tien lakah bul a tan chhe hran lova, set hmasa pahnih a la nghal. Set khatnaah game thum chiah a hloh a, set hnihnaah tie break hmangin a chungnung zui leh bawk. Set hnih a lak zawn vangin third round lut ngei tura ngaih a ni hman.
Player langsar lakah set hnih hloh zawn mah se kum 19 mi Tien-a’n huaisen takin a khingpui a beilet a, thil mak a thlentir ta hial. Set thumnaah inkhel hmuhnawm tak an lantir a, game an inlakchhawk zak zak hnuin tie-break khelh a ni. Tie-break-ah mak tak maiin Tien a chungnung a, set a la ve ta nawlh. Set a lak hnuin inrintawkna sang zawk nen a inlan zui a, set linaah a khingpui sawpin game khat chiah a hloh a, awlsam zetin set a la nawn leh. Set hnih ve ve an lak hnuin inkhel a hmuhnawm zui viau. Set nganaah break nei thei an awm lo ve ve a, tie-break hmangin chak tur zawk zawn a ngai. Tie-break-ah hian Tien a chungnung zui leh ta mai a, inlehthalna lian thlentirin a khingpui Medvedev chu 6-3 7-6 (7-4) 6-7 (8-10) 1-6 7-6 (10-7) in a hneh a, third round a inhlangkai ta a ni. Medvedev vaw tlatu Learner Tien hi Pete Sampras (1990) hnu lamah Australian Open third round lut thei naupang ber a ni nghe nghe.
Inelna neih mek hi zirtawpni khan Melbourne Park-ah khelh chhunzawm a ni a, player langsar pathum; Novak Djokovic, Carlos Alcaraz leh Alexander Zverev ten hnehna changin fourth round an lut hlawm.
Australian Open-a vawi 10 champion tawh Djokovic hian third round-ah Tomas Machac a hmachhawn a, set thum la zawnin hnehna a chang. Serb hian bul a tan tha viau a, set khatnaah game khat chiah a hloh. Set hnihna leh set thumnaah break a neih a chhawr tangkai ve ve a, set la zawnin, 6-1 6-4 6-4 in hnehna a chang a, fourth round a inhlangkai.
Zirtawpnia inkhel dangah player ngaihven hlawh Carlos Alcaraz chuan Nuno Borges a hmachhawn a, set khat hloh chungin hnehna a chang. Alcaraz hian set hmasa pahnih a lak zawn hnuin set thumnaah a che fuh tawk lova, tie-break khelh a ngai. Tie-break-ah Borges a chungnung. Set hloh bawk mah se Alcaraz a insiamtha thuai a, set lina la zui lehin Nuno Borges lakah hian 6-2, 6-4, 6-7 (3-7) leh 6-2 in hnehna a chang zui ta a ni.
Djokovic leh Alcaraz rual hian Alexander Zverev chuan Australian Open 2025-a hming chher thar tak Jacob Fearnley chu 6-3 6-4 6-4 in a hneh ve bawk.