Donald Trump-a’n Hollywood Ambassador atan Jon Voight, Mel Gibson leh Sylvester a ruat

Donald Trump-a’n Hollywood Ambassador atan Jon Voight, Mel Gibson leh Sylvester a ruat
US President-Elect Donald Trump, January ni 20-a an lak luh hunah US President 47-na ni tawh mai tur chuan Angelina Jolie pa Jon Voight, Mel Gibson leh Sylvester Stallone te chu Hollywood special ambassador atan a ruat a, Trump chuan Hollywood hi ‘hmun buai tak’ ni a a hriat thu a sawi bawk.
Trump chuan, “Tun kum li kalta chhunga ram dang laka sumdawnna nasa nasa taka loh tawh Hollywood chu tunhma zawng aia lian zawk, tha zawk leh chak zawk dinthar leh turin ka tana Special Envoy angin an awm ang. Heng mi pathum talent nei tha tak tak te hi ka mit leh beng an ni ang a, an rawtna ka theih angin ka tipuitling zel ang. United States of America kan nih thin ang kha kan ni leh ang a, Hollywood tana hun rangkachak a ni leh ang,” a ti.
Jon Voight, kum 86, Gibson, 69, leh Stallone, 78, te hian 2025 presidential election-ah Trump an thlawp vek a, mahse, Trump-a’n ambassador tura a ruatna hi an pawm dawn nge dawn lo tih an la puang lo. Gibson hi chuan Trump-a ruatna hi midangin social media-a an hriat rual thoin ani pawhin social media-ah bawk hian a hre ve chauh niin a sawi a, Voight leh Stallone te hi chuan engmah an la sawi lo.
Gibson chuan, “Engpawh nise a tulna hi ka hmu ve a. Khua leh tui tha ka nih anga ka tih tur chu ka theihna zawn a tul anga tanpui hi a ni,” a ti a. Los Angeles kangmei chhuak avanga a in chân hlim hlawt Gibson hian fiamthuin, “Ambassador chenna tur bik te a keng tel lo maw?” a ti bawk.