Member 72 awmna NDA ministry piang fel ta

Prime Minister Narendra Modi chuan a zawnin term thum a chelh ta a, Pathianni zan khan Rashtrapati Bhavan-ah a Council of Ministers 71 te nen rinawmna thu tiamtira lakluh a ni.
Union Council of Ministers-ah hian mi 81 an awm thei a, mahse, mi 72 member atana lakluh niin coalition sorkar a nih angin a huam kim hle a, portfolio 11 lai chu BJP tena National Democratic Alliance (NDA) member te an pe a ni.
BJP te thawhpui panga Chief Minister of Karnataka leh Bihar lo ni tawh te pawh telin Cabinet pek an ni a. H.D. Kumaraswamy, Janata Dal (Secular), Hindustan Awam Morcha (HAM) leader Jitan Ram Manjhi, Lok Janshakti Party leader Chirag Paswan, Ram Mohan Naidu, Telugu Desam Party (TDP), leh Rajeev Ranjan Singh “Lallan”, Janata Dal (United) te pawh an tel a.
Jayant Chaudhary, Rashtriya Lok Dal leh Pratap Rao Jadhav, Shiv Sena te chu Minister of State independent charge pek an ni a. Anupriya Patel, Apna Dal, Ram Nath Thakur, JD(U), Chandrashekhar Pemmasani, TDP leh Ram Das Athawale, Republican Party of India te chu Ministers of State pek an ni.
NDA allies zingah Nationalist Congress Party te chuan aiawh an nei ve lo va. MoS (independent chrage) pekah thlem an ni a, mahse, Cabinet chu an chang dawn lo thung, party chief Ajit Pawar chuan an chanvo thlen hun an nghah tur thu a sawi a. All Jharkhand Students Union (AJSU) pawh engmah pek an ni lo.
Council of Minister te hi State 24 atanga thurchhuah te niin chung zingah chuan Kerala-a BJP ten Lok Sabha MP an neih hmasak ber Suresh Gupta pawh a tel a. Minister thlanna kawngah caste leh community aiawh tel vekin Minister 27 te chu Other Backward Classes (OBC) niin, 10 chu Scheduled Castes (SC), panga chu Scheduled Tribes (ST), leh minority communities atangin panga an awm bawk.
Tun hnai kum 10 chhunga Modi sorkar a minister ni tawh zingah 10 chu minister an la ni zui zel a. Chung zingah chuan Rajnath Singh, Nitin Gadkari, Nirmala Sitharaman, Piyush Goyal, Giriraj Singh leh Kiren Rijiju te pawh an tel a ni. NDA sorkar chuan continuity leh experience ngai pawimawhin Council a member 43 lai chu MP tum thum ni tawh niin chung zingah 39 chu minister pawh lo ni tawh te an ni bawk.
Chief minister hlui lo ni tawh te zingah Madhya Pradesh Chief Minister thin Shivraj Singh Chouhan, Haryana chief minster thin Manohar Lal Khattar leh Assam chief minister thin Sarbananda Sonowal te pawh an tel a. Anni bakah hian Manjhi leh Kumaraswamy te an tel bawk.
Council of Minister ruatah tun hnai lawka inthlang mai tur Maharashtra, Haryana leh Jharkhand te hisap rana ruat leh siam a ni bawk.
Khattar telh chu Prime Minister Narendra Modi thuihruai hnai a nih bakah, Lok Sabha MP tum ruk ni tawh Rao Inderjit Singh te, senior Gujarati leader Krishan Pal Gujral te ruat chu BJP tena south Haryana leh non-Jat vote bank hum an tumna zel anga ngaih a ni a. Haryana-ah hian Lok Sbha seat 10 awmah BJP ten panga an la a ni.
Maharashtra-ah pawh veteran leader Nitin Gadkari leh Piyush Goyal te chu Union Cabinet ah dahluh leh niin Vidarbha leh Konkan region aiawh an ni a. MP tum thum ni tawh Raksha Khadse leh PUNE MP thar Murlidhar Mohol te chu Central Minister thar tur an ni bawk a. Maratha leader Shiv Sena MP Prataprao Jadhav chu party chief State CM Eknath Shinde an a rawt a ni thung.
Maharashtra bikah hian Caste-wise in kalpui a ni ber a. Gadkari chu Brahmin a ni a, Goyal chu Marwari niin Kadhav chu Maratha leh Khadse chu Teli community a ni bawk.
Inthlang tur tho Jharkhand bikah Annpurna Devi chu Koderma OBC leader niin Sanjay Seth chu trading community a ni bawk a, an pahnih hian Council ah telh an ni ve ve a, BJP te tana state inthlana vote hui theihna tura ngaih an ni.
Uttar Pradesh atangin mi pakua Prime Minister Modi tiamin telh an ni a. Inthlana beisei an phaklohna siam that tumin caste behchhanin minister ruat an ni. Rajnath Singh, Prof. S.P.S. Baghel, Pankaj Chaudhary, B.L. Verma leh Anupriya Patel, Apna Dal (Sonewal) te bakah mithar pali te chu Jitin Prasada, Kirti Vardhan Singh leh Kamleh Paswan bakah RLD’s Chaudhary te an tel a. Caste ang chuan Rajput pahnih, non-Yadav OBC pali leh non-Jatv Scheduled Caste leh Brahmin pakhat an ni.