MHIP-in na taka hrem phut

A thiannu na taka kutthlaktua puh Laldingngheta chu MHIP Chawlhhmun Branch chuan a tihsual phut tawka na taka hrem an phut a, pawikhawihtu chhungten vanduaina tawk ta hliam enkawlna senso tumsak vek turin an phut tih an sawi bawk.
MHIP Chawlhhmun Branch thuchhuak chuan, April 16 zana an member, nula Remsangpuii chunga rawng taka Laldingngheta chet dan chu an dem takzet a. An hmeichhiatpui leh an member tawrhna chu an tuarpuiin an rilru a na takzet tih a sawi. ‘Hetianga rawng taka chetna hi tu chungah mah thleng tawh lo se kan duh takzet a ni,’ a ti.
Tihhlawhtlin ngei tura thil phut an neih tarlangin, ‘Laldingngheta hi a thil tihsualah a phu tawka na taka hremna pek ni rawh se; hmeichhe chaklo leh awmnem zawkte chunga rawng taka chet hmang hi kan veng a awm atan kan duh lo; Nl. Remsangpuii inenkawlna senso zawng zawng hi pawi khawihtu /chhungten tum sak vek rawh se,’ a ti.