Mi sang chuang thah an ni tih Iran hotu Khamenei-a’n sawi ve ta

Mi sang chuang thah an ni tih Iran hotu Khamenei-a’n sawi ve ta
Iran-a supreme leader chuan vantlang hriata a vawi khat nan an rama mipuiten lungawi lohna an lantira mi sang chuang thah an ni tih a puang.
Inrinni khan Ayatollah Ali Khamenei-a hian mi sang chuang thah an ni tih sawiin ‘thenkhat chu mihring intihdan tur awm ang lo takin, rawng takin’ an thih thu a sawi a, heng thihnaah hian US chu a mawhpuh bawk.
Tar lan tawh thin angin Iran-a mipuiin lungawi lohna nasa taka an lantirah hian mi 3,090 an thi niin US-a Iranian Human Rights Activists News Agency (HRANA) chuan a tar lang a, pawl dang thenkhat phei chuan hei aia tam hi an sawi a. Internet an tihthih avangin thil thleng hi chiang taka hriat vek a ni lo.
US President Donald Trump-a chuan Iranian mipuite hi ‘chhunzawm zel turin’ a ti a, venhim hna thawktuten an that a nih chuan sipai a tirh tur thu a sawi.
“Israel leh US inrawlhna avangin chhiatna leh thihna sang tel a awm a ni,” tiin Khamenei-a hian a sawi niin Iranian sorkar chanchinbuin a tar lang.
“US president hi thihna, thil chhia leh Iranian-te ram hliama a awmnaah a tel a ni,” a ti.
December 28 atanga eibar hniam lutuk avanga mipuiin lungawi lohna an lantir hi a hnuah an rama sakhaw hotu, puithiam rorelna hnuaia awm duh lohnaah a chang zui a ni.
Iranian sorkar chuan lungawi lova ‘tharuma chete’ chu Iran hmelmaten an pui niin a sawi bawk.
Mipuite hi tharuma beih let an ni a, video darh thenkhat, a tak ngei a ni tih finfiahah pawh venhim hna thawktuten an kap lai pawh a lang nual.
Internet leh inbiakpawhna dang tihthih vek a ni a. Inrinni thleng khan inbiakpawhna hi 2% awrh chauh hman theihin a awm niin cyber monitor NetBlocks chuan a tar lang.
Inrinnia thu a sawinaah hian Khamenei-a chuan an ram chuan President Trump-a chu ‘dan bawhchhia’ tia an ngaih thu leh US chu heng an thil tawnah hian ‘mawhphurhna tam tak nei’ niin a sawi bawk.
Social media-ah ‘America-in a tum chu Iran lem zawh vek’ a nih thu a tar lang bawk.
Trump-a hian supreme leader thu sawi hi a la chhang lo.
US state department chuan Inrinni khan ‘Islamic Republic hian American awmhmun beih tumin an inbuatsaih’ tih an hriat thu a sawi thung.
An bei a nih vaih chuan Iran hian ‘tha chak lutuk’ an tawng dawn a, Tehran chu ‘President Trump-a infiampui lo turin’ an chah tih an sawi.