Milan a\anga inpuchhuak tur Giroud

Tun nipui insuan hun hian AC Milan chhuahsanin Major League Soccer (MLS) lam a pan dawn tih Olivier Giroud chuan a nemnghet ve ta.
Kum 2021-22 season-a Milan kuta Serie A title luhpuitu langsar pakhat Giroud hi France tana goal khung hnem ber ni mekin, tunah kum 37 mi a ni ve tawh a; a chhuahsan tur Italian club tan hian game 130-ah goal 48 thun tling tawhin, assist tum 20 a siamchhuak tling tawh bawk.
America rama a club zawm tur hi chiang taka tarlan la awm lo mah se a international team-mate Hugo Lloris khelhna Los Angeles FC a nih rin a ni.
A chhuah tur thu hi amah ngeiin nemnghehin, “Milan tana ka game hnuhnung pahnih ka han khel leh zet ang a, MLS lamah ka career ka chhunzawm ve tawh ang.
“Tunhnai kum thum liamta chhunga Milan-a ka hlawhchhuah takte hi ka chhuang a, tun hi Milan-a ka kum tawpna tur ni mah se ka thinlungah erawh a cham zui reng tawh dawn a ni,” tiin thlahna thuchah a sawi.
Kum 2021 khan Chelsea chhuahsanin Giroud hian Milan a zawm a; west London-a a khawsak lai khan Blues chu season li chhungin Champions League, Europa League leh FA Cup a lakpui hman.
England-ah hian Stamford Bridge lama a insawn hmain Arsenal-ah kum ruk a khawsa bawk a, khatih chhung khan game 253-a goal 105 thun tling chungin Gunners chu FA Cups pathum a lakpui hman.
France tan pawh match 131 a khelh tawh atangin Giroud hian goal 57 a tilut tling tawh a, an hnuai chiaha awm Thierry Henry aiin goal rukin a khung tam tawh zawk a ni.