Mizoram mipuite hlimna ni – June ni 30

1986 June ni 30 zanah Doordarshan-ah Mizoram remna thuthlung
ziah a nih thu an puang a, chumi zana Mizoram mipui hlimzia chu vawiin thlenga Mizoram hrilhfak a la ni.
Chumi zan chuan Aizawl khawpuiah thawm a reh lo a, mi an tlanchhuak, khawlaiah an lawmzia an puang a, kawngzawh an awm, motor-a inzuia tlan kual an awm, motor ke chhia hala meipui chhep an awm, a thenin darkhuang an vua, an then an lungchhia, hmun dang pawh chutiang tho chu a ni.
1966 March ni 1-ah Zoramin zalenna a sual a, chumi hnua India sorkarin Mizoram mipui a tih dan kha a hrehawm em a, mipuiin remna leh muanna an thlahlel a ni.
March ni 5-ah jet fighter leh bomb hmangin Aizawl beih a ni nghal a, a hnuah khaw dang pawh an bei; Hnahlan, Tlabung, Sangau, Khawzawl, Pukpui, S Mualthuam, Bunghmun leh Hmuntlang te.
Jet fighter hmanga Mizoram beih a nih laia India ram hruaitute chuan he thil hi an pha a, prime minister Indira Gandhi pawhin Mizoramah bomb ni lovin ‘ration’ an thlak niin a sawi. Vawiin thlengin an la sawi tha duh lo a ni ber.
1967 atanga 1970 thlengin India sorkarin Mizoramah khua a khawm a, khaw 516 chu khaw 110-ah a khungkhawm a ni. Mi an duhthu ni lovin an pem luihtir a, mahni khua an ngai em em a, ei tur an harsa em em bawk. Tun hnuah media thenkhat chuan khawkhawm hi German-ho concentration camp nen an tehkhin hial a ni.
Khawkhawm-a khalhkhawm an nih hnuah an buh kalsante chu hal zui a ni a, hal lohte pawh lak lohvin a tawih ral a, mipuiin ei tur an nei lo thuai niin a sawi. Khatia mipuiin ei tur an neih loh khan sipai lam chuan ‘control’ buhfai leh atta an sem a, mipui chu sipai thuhnuaiah an kun ta tlawk tlawk mai a ni.
Assam chief secretary hlui Vijendra Singh Jafa chuan: “Khatiang ralrel kha India hian tunlai hian hnam tenaute lakah hmang leh se chu, he kum sangbi tharah hian media zingah lehnghal, ram chhung leh ram pawnah insawifiahna tur a ngah khawp ang, 1960s vel ang mai mai kha chu a ni lo ang,” a ti.
India sipaiin mi in an dap a, an duh duh an man. Mi engemaw zat an man a, mi tin an buai a ni ber.
Chutiang khawvelah chuan mipuiin remna an thlahlel a, political party tinin remna an zuar, kohhranin an duh a, zirlai pawlte leh tlawmngai pawlte’n an duh bawk. Hun engemaw chen an nghah hnuah June ni 30, 1986-ah remna thuthlung an ziak ta a, vawiin thlengin June ni 30 chu Mizoramin Remna Ni a ti ta a ni.
Inremnaah hian MNF aiawhin an president Laldenga’n hming a ziak a, India sorkar aiawhin a hun laia union home secretary RD Pradhan-a, Mizoram sorkar aiawhin a hun laia chief secretary Lalkhama’n hming a ziak bawk.
Remna thuthlunga hming ziaktu Lalkhama chuan remna ziah a nih khan Mizoram mipui an hlim tih a sawi a, “Kan hlim tlang… Kan hlim khawp mai,” tiin, “Mipui khan remna awm se, buaina tawp se an ti a, Mizoram kha a hrehawm em a,” a ti.
Kohhran, tlawmngai pawl, political party-te leh mipuiin remna awm se an duh tih a sawi a, “Kohhran, NGO, political party-te nawrna avanga he inremna thuthlung hi ziah a ni tiin a preamble-ah lo ziak se tha tur a nia,” a ti.