Mizoramah opium man tur awm

Ruihhlo hlauhawm opium lakah Mizoram a la himah ngaih a ni a, man tur erawh a awm. Man tur hi a awm ve zeuh zeuh a, kum liam taah pawh khan excise force te’n an man.
2025-ah khan Mizoram excise & Narcotics (MEN) department-in opium hi kg 1.193 an man a, a hma kum 2024-ah kha chuan an man lo.
Tun hnaiah man tur a awm ve zeuh zeuh a, 2022-ah kg 0.015, 2023-ah kg 0.066 an man. 2024-ah an man lo a, kum khat hnuah an man leh.
MEN department hotute chuan opium hi Myanmar leh Manipur atanga rawn lut a nih thu an sawi a, Mizoramah man tur awm ve thin bawk mah se Mizoram chu a la himah ngaih a nih thu, Mizorama an man pawh hi hmun danga mi tur a nih thin thu te an sawi.
Mizoram a la himah ngaih a nih rual hian thingtlang khaw thenkhatah lo zu ve chu an awm tih an sawi a, meizial zuka lo zu ve an nih thu, zu nasa an nih loh thu an sawi.
Opium hi Mizorama ruihhlo ti thinte ngaihnat zawng ni lova a lan thu an sawi a, a hlauhawmzia an hriat avangin ruihhlo ti thinte’n tih enah an en lo ve bawk nia a lan thu te an sawi bawk.
1995-ah daih tawh khan khan opium hi an lo man tawh a, kg 0.480 an man. 1995 hi an man hmasak ber kum a ni a, an man loh vang vang hnuah 2001 khan kg 4.809 an man. 2001 hnuah hian an man ta fo a, tam tham erawh a ni ngai lo. 2016-ah a pung ta hluai a, hemi kum hian kg 18.478 lai an man. 2016 hi an man tam ber kum a ni a, a hlawmin tam tham tak an man a ni. Mahse hemi kuma an man hi ram danga mi tur a lo ni.