2023 kumtawpa Mizoramin MLA inthlanpui a neih turah Mizoram Kohhran Hruaitute Committee (MKHC) chuan sawrkar tha leh nghet neih theihna’n mipui leh political party-te tan thuchah a siam a. Ngaihpawimawha zawm turin a ngen lawk.
Candidate ruat chungchangah, ram hruaitu tha kan neih theih nan political party hruaitu zawng zawngten fimkhur leh uluk taka candidate thlang chhuak tura beisei an ni tih sawiin, ‘Pathian tih mi, mi hming tha leh rinawm; ruihtheih thila fihlim; hlepna bawlhhlawh leh thamna duh lo; mipat hmeichhiatna kawnga hminghliauna nei lo; mahni awmna kohhran, sakhua leh pawla mi rinawm’ thlang turin a ngen.
Mipui leh political party leh candidate-te MKHC-in a beisei dan a sawi a. Inthlan thianghlim leh zalen taka mitinin mahni duh zawng thlan a nih theih nan, political party zawng zawngten hel pawl rawih emaw invau leh ralthuam lam chi emaw hman lo turin a chah a; MLA atana candidate-ten inthlan dawna vote leina anga ngaih theih sum leh thildang sem emaw pek emaw ti lo turin a chah.
‘Political party-ten a taka tih theih loh tur zuara mipui bumna ang thil intiam loh nise,’ a ti a. Kohhran leh khawtlang inpumkhatna leh inunauna tichhe thei – hnambil bik emaw pawl emaw tana political party leh candidate ten hma la lo tur te; political party tin leh candidate tin ten tharum thawhna chawktho thei zawnga tawngkam uchuak tak leh inelsen zawnga midang sawichhe lo tur leh chutiang lam hawi reng reng social media-a vawrhdarh lo turin a chah.
Candidate-te hmalakna tura pawl bik emaw hnam bik emaw mi tlemte te hamthatna tur emawa intiamtir lo tur te; mi tumahin sum leh therhlo hmanga lei tumtute lakah kan vote (zalenna) hralh lo tur leh, hetianga tih tumtute hnawl ngam tura tan la turin a chah a. Political party leh candidate ten intihphurna atana ruai theh leh sum seng hnem zawnga hma la lo turin a chah bawk.
‘Kristian ram kan nih angin, mipuiin zawlnei der leh zawlthupuan hnawl nachang hre tur leh political party ten hetiang thupuan ang chi reng reng hmanrua atan hman loh ni se; vote nei zawng zawngten kan mawhphurhna a nih ang taka vote thlak vek nise,’ a ti.
Sawrkarna siamtu apiang chu kan ram tana Pathian ruat an ni tih mipuiin hria a, sawiselna tur ringawt ngaihtuah loa ram leh hnam tan dik taka hna an thawh theihna’na tawiawm chu kan bat a ni tih hrereng turin MKHC chuan a chah lawk a. Kan ram hruaitu tur mi tha kan thlanchhuah theihna’n leh muanawm taka inthlan a nih theih nan Pathian hnenah tawngtaia tan la turin mipui a ngen a ni.
-- Advertisement --
# A taka tih theih loh tur zuara mipui bumna ang thil intiam loh nise
# Candidate-ten vote leina anga ngaih theih sum leh thildang sem/pek loh nise
# Sum leh therhlo hmanga min lei tumtute lakah kan vote (zalenna) hralh loh nise
# Sawrkarna siamtu chu kan ram tana Pathian ruat an ni tih hria a, sawiselna tur ringawt ngaihtuah loa ram leh hnam tan dik taka hna an thawh theih nana tawiawm hi kan bat a ni