MNF-in Dampa biala chak an lawm Hruaitute inkarah buaina a awm lo: – Zoramthanga

MNF party chuan Dampa biala by election-a an candidate a tlin chu Thawhtanni khan Pathian hnena lawmthu sawina hun an hmang a. MNF president Zoramthanga chuan inthlana an chak hnuah chanvo inchuhin an buai dawn lo tih a sawi.
MNF president chuan, an ni duhtawk niloin, Pathianin a duhtawk a pe thin tih a sawi a. Dampa biala ZPM candidate chak lohna chu ZPM party chaklohna leh chief minister chaklohna a ni a; Bana Kaih policy hnawlna a ni, tiin, “Hei hi Pu Zoramthanga sawi niloin, Pu Lalduhoma sawi a ni,” a ti.
MNF hruaitute inkarah buaina a awm lo tih sawiin, inthlana an chak hnuah chanvo inchuhin an buai dawn tia sawi an ni a, hetiang lamah hian MNF an buai ve ngai loa, an buai dawn lo tih a sawi.
MLA atana thlantlin Dr R Lalthangliana chuan, an hnehna chan chu ama hnehna a ni loa, Pu Zoramthanga kaihhruai MNF hnehna a ni, tiin, chu hnehna chu Pathian vang a ni tih a sawi a. MNF hruaitu, party mi leh bial mipui thawhrimna piahlamah, Pathian vanga hetiang dinhmuna ding thei an ni tih a sawi a ni.
“Pu Zoramthanga kaihhruai MNF hian Zoram hmasawnna ruhrel lian leh pawimawh zawng zawng a lo thawk tawh thin a. Hun khirh leh thim tak tak kan lo paltlang tawh. Hei hi Pu Zoramthanga Pathian mi nih vang a ni,” a ti.
Inthlan ngaihsak leh ngaihven hlawh ber emaw tih hial turah ruling tha chakna zawng zawng nena beih ni mah se, Pathianin chakna a pe tih Dr R Lalthangliana hian a sawi bawk.
Lawmthu sawi inkhawmah hian Dampa bialtu MLA a nih laia chatuan ram pan ta Lalrintluanga Sailo nupui Lalbiakthuami pawhin thu a sawi a ni.