Naktukah India head coach kirleh dawn

Naktukah India head coach kirleh dawn
Bengaluru khuaa SAFF Championships bul an tanna inkhelah karliamta Nilaini daih tawh khan India chuan captain Sunil Chhetri hat-trick siam hmangin thenawm hmelma Pakistan lakah 4-0 hnehna an chang a; kha match-a red card hmanga hnawhchhuah India head coach Igor Stimac chuan naktuk, Thawhlehni hian India final group stage match-a Kuwait an tum hunah touchline atangin team a kilkawi leh thei tawh dawn.
Mizo player pahnih Lallianzuala Chhangte leh Lalengmawia Ralte telna India team hian match khat hremna a tawh avangin karliamta Inrinni khan head coach tel loin Nepal lakah 2-0 hnehna an sualchhuak zui leh a, an title kawl lai hum thei turin semi-final an luh phah.
South Asian Football Federation (SAFF) general secretary Anwarul Huq chuan PTI hnenah Pakistan laka Stimac-a tihsual kha match khat hremna aia lian thei a nih loh thu hrilhin, game khat hrem baka hremna dang lekkawh thei tura SAFF Disciplinary Committee lama thlen zui tulna a awm loh thu a tarlang tel.
He thu hi Dhaka khawpuia a zin laiin Anwarul Huq chuan thuthar thehdarhtute hi a hrilh a, referee leh match commissioner report atanga a lan danin India boss tihsual kha SAFF Disciplinary Committee pui pui ngaihtuah zui turin a serious tawk lo tih a sawi.
Coach a nihna zawn piahlama football-a tawnhriat ngah tawh
Stimac hi Croatia player a nih laia 1998 World Cup bronze medallist lo ni ve ngat tawh kha a ni a; Pakistan leh India insut tum khan throw-in tura Pakistan player Abdullah Iqbal inbuatsaih laiin a va inrawlhbuai a, player ball lak tur chu lo tisukukin, Pakistani player thenkhat leh an coaching staff thenkhat nen an inbakkaih laih a, referee Prajwal Chhetri leh match official dangte inrawlhin buaina lian zawk thleng thei an tudai a, mahse, referee Chhetri chuan tum luih ve renga lehlam pawl player tibuaiah puhin Stimac chu team enkawl zui thei lo turin a hnawtchhuak zui ta a ni.
Stimac hnawhbo a nih hnu khan India defender hlui Mahesh Gawli chuan touchline atangin team vil hna a kengkawh zui a, Inrinnia an group match vawihnihnaah pawh Gawli bawk hian hrem tawk head coach hmunruak luahin Nepal lakah Indian team a kaihruai a, 2-0 hnehna a chanpui leh.
Direct emaw indirect emaw pawh ni se red card hrim hrim hi player leh coach tan match khat khelh loh phahna a ni phawt a, mahse, tihsual dan azirin match li thleng hremna pek theih a ni a, chutiang case-ah chuan disciplinary committee lamin an ngaihtuah thei a, India head coach tihsual hi chu thuneitute’n match khat hremna nena inhen tawk velah an ngaihsak ta a ni.
Sree Kanteerava Stadium, Bengaluru-a Group A match-ah khan Indian team chuan tan phat atanga inkhel thunun nghalin, Indian captain Sunil Chhetri hat-trick tuihnai tak baka substitute Udanta goal khat thawh nen Pakistan lakah 4-0 hnehna an chang.
Tarlan tak angin, Inrinni liamta khan Nepal lakah India chuan 2-0 hnehna chang lehin, Chhetri bawkin goal a khung leh a, ti hian, ram tana game 139 a khelh tawhah India captain hian goal 91 khawl tling chiahin, Iran tana match 148 khela goal 109 thun tling Ali Daei tih lohah chuan Asian zinga international goal thun hnem ber niin, khawvel huapa tuna la inkhel mek zingah ram tana goal khung tam pathumna a nih nghal bawk piahlamah la inkhel mek Asian footballer zinga ram tana goal khung hnem ber a ni mek bawk.
India group match pahnihnaah hian Delhi tlangval Chhetri chuan minute 61-ah India goal hmasa zawk khungin, hei hi tournament kal laia a goal li tihluhna a ni nghal.
Second half minute 70-ah Mahesh Singh chuan India goal hnihna thawh zui ve lehin, a thlengtu team hian khelh hniha point ruk hmu chungin point ruk ve bawk nei tawh Kuwait nen Group A atangin semi-final an lut a, June ni 27, naktuk, Thawhlehni hian group winner nih inchuhin Blue Tigers leh Arab team hi an insu dawn a, an group match hnuhnungber tur ve ve a ni.
India leh Kuwait-in an group-a sang ber nih an inchuh dawn lai hian match hnih ve ve chak lo tawh Nepal leh Pakistan erawh last four lut pha loin an tla fel tawh thung.