National champion Muanawma

Manohar Parrikar Indoor Stadium, Goa-a khelh mek Yonex-Sunrise 45th Indian Masters (Veteran) National Badminton Championships – 2022-23-ah Lalmuanawma, Hlimen veng chuan India champion ni turin final-a a khingpui Antony Kattapurath Jacob chu awlsam takin a hneh a, phu takin a champion.
Mizoram Police Badminton Club aiawha inelna lian hmachhawn Muanawma hian final lut turin khingpui hautak zet mai a nei a. Semi-final-ah he inelnaa seeded No. 2 Arup Baidya nen an inhmachhawn. Final luh inchuhna boruak sanga takah atan chak harsa tura ngaih a ni. Inkhel pawimawh takah Hliamen tlangval Muanawma hian a khel tha viau a, set hloh lovin hnehna a changin a khingpui rup Baidya hi 21-16, 21-18 a hnehin final a lut.
Semi-final hautak tak a paltlang hnuin final-a he inelnaa champion tura rinkai ber Seeded No 1 Antony Kattapurath Jacob a hmachhawn zui leh a, fiahna hautak a hmachhawn zawn. Final-ah rinkai lo zawk ni chungin inlan mah se huaisen takin Muanawma a inlan nawn leh a, set hloh lova set la zawnin inlehthalna lian a thentir leh ngat. Muanawma hian 21-17 a set khatna a lak hnuin set hnihnaa inkhel hautak zawk a hmachhawn. Set hnihnaah hian deuce an neih hnuin Muanawma hian 22-20 in set a la zui leh a, India ram puma 40+ Men’s Singles category-ah ropui takin a champion ta a ni.
India rama champion thar Muanawma hian kum 40 chin chunglam inelnaah hnuhma tak tak a lo nei tawh a, March ni 23-a a champion hma khan India ram pum huap inelnaah vawi thum a lo champion tawh a. Ningania hnehna lian a sualchhuah tak leh nen khan India ramah vawi li a champion tling ta chiah.
Badminton inelnaah Mizoram tihmingthatu Lalmuanawma hi a champion vangin South Korea a neih tur World Championship-ah India aiawh turin a tling nghal a. Khawvel huap inelna hmachhawn turin a inbuatsaih zui ang. Tun hi World championship hmachhawn tura a tlin vawi hnihna a ni a. Tun hma deuh khan 35+ Men’s Singles category World Championship, Polland a khel turin a lo in vaw tling tawh bawk.
Mizoram Badminton Association chuan Mizoram ti hmingthatu Muanawma hi a chhuang in, hlawhtlinna sang a chang hi an lawmpui thu an sawi a. World Championship a hmachhawn leh turah pawh duhsakna sang ber a hlan nghal a ni.
Boxing-ah palian huanga kawnghren inkawl sem pahnih; Fury leh Usyk te hi hlawh lak dan tur chungchangah chuan harsa lo takin inremna an nei thei mai a. WBC champion Tyson Fury-a’n sum an lak luh atang 70% chan a phut chu WBA (Super), IBF leh WBO champion Usyk chuan awlsam takin a pawmpui thei mai. A tumpui tur Usyk aiin hlawh tam fal viau dawn mah se Fury hian Usyk hmachhawn a tum tak tak lo niin ngaih theih a ni a, rematch a duh lo teh tawp. Khawvelin palian huangah tlawm nei lova kaltluang mek Fury hi palian champion hlui Anthony Joshua nen an inhnek a hmu chak a, British boxer pahnihte hi inhnek tumin an indawr ve thin bawk. An inrem thei mai dawn emaw tih laiin rem lohna a lo awm leh thin a, Fury lam ten chhuanlam an siam leh mai thin. Heti a nih vang hian Fury hian Anthony Joshua leh Oleksandr Usyk te hi a hmachhawn hreh hle nia ngaitu an tam hle.
Tyson Fury nen inhnek tur an indawrna a tlawlh a, an inbiakna tihtawp a nih tak vang hian Ukranian boxer huaisen Usyk chuan a training camp pawh a chhuahsan fel tawh niin chanchinbu mite chuan an tarlanga, an inbiakna a tlawlh chungchang hi thuchiang awm thuai tura ngaih a ni.
Usyk hian British boxer lar Anthony Joshua hnein a kawnghren kawl lai pali a chhuhsak a. Joshua nen an inhnek nawnnaah hnehna changin a kawnghren a humhim a. Tyson Fury hneh ngei tum viau mahse hnek theihna hun tha a nei thei dawn ta lo niin a lang a, a ui viau tura ngaih a ni.
Tyson Fury nen an inhnek thei dawn lova a lan tak vangin WBA chuan Usyk hi amah chotu Daniel Dubois hmachhawntir an tum nghal a. Kum 25 mi Briton Dubois aiawhten an lam hawi a, ring chhungah fiahna hmachhawn huam turin Usyk an nawr.
Kum 1999 khan palian huanga inhnek ngaihven hlawh takah Lennox Lewis chuan Evander Holyfield a hneh a, palian huanga kawnghren ngaihhlut hlawh pali a kawl kim vek. Kum 1999 hnu lamah palian huangah kawnghren pali kawl kawp thei an la awm leh ta miah lova. Tyson Fury leh Usyk ten inremna an nei thei lo nia a lan tak vangin Lennox Lewis hnung zui thei an awm har leh zual dawn ta a ni.