Naupang leh hmeichhe enkawl hi kan vaia mawhphurhna – SW minister

ichhiate enkawl leh humhim hi khawtlangin kan vaia mawhphurhna a ni tih hriat thar a tul tih Social Welfare minister Er Lalrinawma chuan a sawi.
Mamita Observation Home chu Thawhtanni khan Social Welfare minister hian a hawng a. Tumah sualsaa piang kan awm loa, kan hun tawn leh enkawlna tha kan dawn loh thin avanga humsual dai palh mai thin kan ni, tiin, “Kan fate an kalna tur awm kawngah naupang an nih lai atangin kaihruai ila, an tan nitin an hming lama tawngtaisak thin a pawimawh. Nuin a fate a hum thin angin kan zavai mai hian kan khawtlanga naupangte leh hmeichhiate enkawl that leh humhim hi kan mawhphurhna a ni tih inhre thar ang u,” a ti.
Women & Child Development hotute sawi danin, kum 2016 atanga din tan Observation Home-ah hian a din tirh atanga tun thlengin naupang 142 an awm tawh a. Naupang 139 chhuak tawhin tunah hian naupang 3 an la awm. Kum 7 atanga 18 inkar naupang awm theihna niin, thla 4 an awm thin. Thla 4 hnuah Special Home Aizawlah sawn chhuah an ni thin a; tunah hian superintendent hoin thawktu 11 an awm mek. Observation Home hi naupang hremna hmun niloin naupang humsual dai palhte siamthatna hmun, an chhuah hnuah pawh nunkawng dik an zawh zui zel theihna’na an inzirna hmun a ni tih an sawi.
Mamita Observation Home sak hi executing agency chu Women & Child Development, Social Welfare Department niin main building leh superintendent office a awm a. Estimate amount Rs. 87,45,000 niin, 2022 April-a sak tan a ni a, kumin February-a sak zawh a ni. Khum 8 awm tura tih niin tunah hian mi pathum an awm a ni.