ND&PA case-ah pending case nei lo awmchhun Mizoram FSL

Home minister K Sapdanga chuan Zirtawpni khan Directorate of Forensic Science Laboratory a tlawh a. Hetah hian Mizoram FSL chiah hi ND&PA Act kaihhnawih case-a case pending nei loa sample endik zel thei awmchhun a ni tih sawi a ni.
Hmasawnna in a rawn ken tel avangin pawikhhawihna leh misual hnuchhui a hautak sawt tih minister hian a sawi a. Science thiamna hmanga uluk taka chhui a ngaih tak zel avangin forensic laboratory pawimawhna a pun belh zel a, thawktute indaih lo hle mah se, India ramah misual hnuchhui kawngah Mizoram Forensic Science Laboratory a hmingtha hle tih a sawi a ni.
Directorate of FSL-ah hian laboratory 8 – Chemistry Division, Fingerprint Division, Questioned Document Division, Ballistic Division, DNA Division, Photography Division, Toxicology Division, Cyber Forensic Division a awm a. ND&PS Act 1985 hnuaia hriattirna thar berin a phut angin, FSL-a sample thehluh hi ni 30 chhungin endik a, result siamchhuah hman tur a ni. FSL thawktute chuan case a tam avangin officer leh staff tlemtein an thawk a, indaihloh a karah pawh state dangten kum 10 aia tam case tam tak an dahtawl(pending) laiin Mizoramah chuan case pakhatmah pending a nei lo a. India ramah FSL Mizoram chiah hi zero case pendency ti thei a ni.