Netanyahu an Hamas te rawtna hnawl

Israel Prime Minister Benjamin Netanyahu chuan Hamas tena inkahhai awm theih nana rawtna an neih chu a hnawl thu sawiin Gaza-ah hnehna famkim thla reilote hnuah kan nei dawn tiin a sawi.
Netanyahu chuan Hamas te nena inbiakna neih chuan engmah min thlen dawn lo ti bawkin Hamas te rawtna siam te chu awm ang lo tiin a sawi bawk a.
“Solution dang a awm lo va, hnehna chan a ni mai” tiin Netanyahu chuan a sawi a. “Hamas te hi Gaza ah an dingchang leh a nih chuan eng hunah nge mihring an sam leh ang tih chauh a ni mai” tiin a sawi bawk.
Israel chu Hamas tena inkahhai awm theih nana phut an neih te chu a chhang tura ngaih a nih laiin Israel in a hnawlna chu a chiang hle tih a lang a. Israeli official te chuan indoan tihtawp nana Hamas te duhdan leh ngiatna mila kal a tum lo tur a ni.
Senior Hamas official Sami Ab Zuhri chuan Netanyahu chhanna chuan helai region a buaina chu kalpui chhunzawm zel a tum zia a pholang tiin a sawi a.
Hetihlai hian Egyptian official te chuan Egypt leh Qatar te hmalakna a inremna a awm theih nana inbiakna te chu la kalpui chhunzawm zel a ni ang tiin Cairo ah a sawi thung a.
Egypt chuan Hamas leh Israel te chu inpawtfan thei tura ngenna siamin mahse Netanyahu thusawi chuan inremna a awm theih nana hmalakna a tithuanawp hle dawna ngaih a ni thung.
Hamas tena inremna a awm theih nana rawtna an siam zingah a thawhkhatnaah ni 45 chhung inkahhai puan phawt ni se chutih chhung chuan Israel hmeichhia bik saltlang tin te leh mipa kum 19 hnuai lam te chu Hamas ten an chhuah zalen ang a, Israel pawhin Palestinian hmeichia leh naupang lung ina an khung mek te an chhuah zalen ve bawk ang. Israel sipai te chu Gaza a mihring chenna hmun lun lai atangin an sipaite an hnukdawk ang a, Gaza a damdawi in leh refugee camp te thawmthat a ni ang an ti a.
A thawh hnihnaah Israeli saltlang mipa la awm zawng te chu chhuah zalen an ni ang a, Palestinian lung in tang te pawh Israel in chhuah zalen vekin Israel chuan Gaza a chhuahsan ang tih a ni bawk a.
A thawh thumnaah Israel leh Hamas te chuan ruang inthleng tawnna an nei ang tih a ni bawk.
Chumai bakah eitur leh tanpuina tam zawk Gaza a thawnluh tur a ni ang a. ni 135 inkahhai a thlen hnuah Hamas te chuan indona tihtawp a nih theih nan inbiakna neih a ni ang tiin rawtna an siam bawk.
Tuna Israel leh Hamas indona chhuah chhan hi Hamas ten nikum october 7 a Israel mi 1,300 chuang an thah vanga intan a ni a. Israel in a chhanletnaah Palestinian 27,700 chuangin nunna an chanphah tawh a, hliam tuar ringawt pawh 65,000 chuang an awm tawh niin Hamas enkawl health ministry chuan a tarlang.
Hetihlai hian Netanyahu chuan Israel sipai te chu southern city Rafah, Palestinian sang tam tak ten indona tlanchhiatsana an pankhawm chu bei tura hriattir an ni tawh tiin a sawi a.
Buaina in Rafah khawpui a thlen zui zel chuan mihring tawrhna rapthlak tak a thleng zui ang tiin UN Secretary-General Antonio Guterres chuan a sawi nghal a. “Rafah in runa takw ang tih kan hlau a ni” tiin Rafah Crossing a tlanchhia pakhat chuan a sawi bawk a. “Hlauthawng dep dep chungin kan mu in kan thu a ni. Eitur a awm lo vam khua a vawt bawk si” tiin a sawi.
Netanayahu thusawi chuan US in inremna a awm theih nana a hmalakna pawh a hnawl anga ngaih niin Antony Blinken chuan Nialini a news conference a neihah Hamas te rawtna siamah chuan awm ang lo deuh a awm thu sawiin mahse inremna a awm theih nana harsatna tling a ni lo tia sawiin inremna a awm ngei theih nan theihtawp an chhuah thu a lo sawi tawh a ni.
Netanyahu dinna leh Israel in Gaza hmalam hun atana ruahmanna a siam te chu US ngaihdan nen a in ang lo hle bawk a. Netanyahu chuan Gaza a security chu an thnun tur thu sawiin rorelna erawh tualchhung mite Hamas emaw firfiak pawl te nena inhnamhnawihna nei lo ten an kalpui thung ang a ti a ni.
Washington in ruahmanna a siamah thung chuan Palestinian state din a tel thung a ni.
Tuna Netanyahu an Hamas tena inremna a awm theih nana phut an neih te a hnawl hmak avang hian Gaza indona hmalam hun zel tur chu chiang lo hle a ngaih niin Israel chuan Hamas te chhutchimih vek chu a chhunzawm zel dawn a ni.