January 31, Thawhleh zan khan English Carabao Cup semi-final thawh hnihna khelh a ni a. St Marry’s Stadium ah si khat faia hnehna chang tawh Newcastle United chuan an khelmual; St James Park ah 2-1 in hnehna an chang nawn leh a, final an lut a, kum 1969 hnu lamah a vawikhat nan champion tumin hma lam an pan zel. Newcastle hian Manchester United leh Nottingham Forest te inkhela chak zawk zawk final ah an hmachhawn ang.
-- Advertisement --
Season kal meka khel tha, neitu thar an neih hlawkpui tak mai Newcastle United hian St James Park-a an mikhual Southampton lakah bul an tan tha viau a, minute 21 chhung lekin goal hnih an thun hman. Hun tawp dawn hnaihah Bruno Guimarães hnawh chhuah ni bawk mah se an mualah an chak a, Mimuala an chak tawhna nen final an inpet kai.
St James Park-ah Newcastle United leh Southampton ten semi-final second leg an khelh tum hian English Premier League-ah pathumna ni mek Newcastle United in tha zetin bul an tan. Magpies hian inkhel tan atanga minute ngana lekah goal an tun nghal a. An hmahruaina goal hi Sean Longstaff-a’n Kieran Trippier siamsak atanga a thun a ni. St Marry’s ah hnehna an chan tawh bakah an mualah hma taka goal an thun leh bawk vangin Magpies an inringtawk hle tawh a. An mualah chiai lo taka inlan in, an khel tha zui hle.
An mahni mualah ngei an tlawm tawh vangin Southampton hian an si phurh sut ngei tumin tan an khawh zui nghal chat. Si hniha hnufual zawk an nih vangin goal chhuah belh huamin mualneitu an nawr a, hlauhawm nei zauh mahse Newcastle tlarhnung an thiat fuh hleithei lova, goal an thun thei lawk lo. Goal thun an mamawh em em lai hian goal chhuah belh zawkah an tang zui leh ta hlauh zawk.
Season kal mekah EPL club zinga tlarhnung khawng ber pawl Newcastle hian an khingpuite an dang bet a, minute 21-naah an hmahruaina an tihzau belh leh bawk. Minute 21-naah hian hmahruaina goal thuntu Sean Longstaff chuan Almirón siamsak atangin an goal hnihna a thun zui leh a, an hmahruaina a tihzau belh bawk. Minute 21 chhung leka goal hnih an thun tawh bakah first leg-ah an chak tawh bawk vangin Magpies hian si belhkhawmah si thum fai ngawtin hma an hruai tawh a, final lut turin an dinhmun a tha tak zet tawh.
Si belhkhawmah 3-0 ngawt hnufual tawh Saints hi an hnual ngawt bik chuang lova, huaisen takin an khingpuite an nawr chhunzawm zel. An huaisen leh an thawhrin zar zovin goal an thun ve ta nge nge . Minute 29-naah Ché Adams chuan goal thunin an si phurh a sut then. He goal hian Saints a fuih phur viau a, hun tawp thlengin inkhel a hmuhnawm phah ta hial a ni.
St James Park-a inkhelah hian minute 29 chhung lekin goal thum ngawt lut bawk mahse a hnu lamah goal dang a luh belh thei ta miah lo teh tlat thung. Hun tawp dawn lamah mikhual team Southampton hian an si phurh sut tumin tan an khawh zui zel a, minute 89-naah mualneitu player Bruno Guimarães hnawhchhuah a nih vangin beiseina thar an nei naa goal dang an thun belh thei tawh bik lo thung. Tichuan, 3-1 in Newcastle United an chak a, final an lut zui ta a ni.