Ngawlveite enkawlna hmun

Hruaia Kawlni

Tunlai TBCC chungchang a lar hle mai a. An inenkawl danah a dik, dik lo tih lam aiin, he mi denchhen hian Mizorama Ruihhlo/Ngawlvei te enkawlna leh a kaihnawih lam i lo thlir thuak thuak teh ang.
Home hmasa te:
Sawrkar chhinchhiah danin Mizoram pumah Ngawlvei enkawlna hi 36 zet a awm mek. (Aizawl dist.ah 22, Lunglei dist. leh Champhai dist-ah 5 ve ve. Serchhip leh Kolasib dist.ah 2 ve ve).
Heng zingah hian kum 1986-a din, Zoram drivers Ramthar board din Damna In(Zuangtui), Social Guidance Agency (PTC, Lungverh) te kum 1987 a din Synod rescue home (Durtlang) 1988 a din Calvary Hospital TNT (Zuangtui) leh kum 1990 din Rescue centre (Kawmzawl, Lunglei) Sethawn (Jordan centre ni ta) te 1991-a din Blessing home (Sakawrtuichhun) te hi a hmasa pawl an ni awm e. Tuna lar tak TBCC hi kum 2005 ah Chawnpui a bul tan a ni thung.
Ruihlo vanga thi te:
Sawrkar chhinchhiah dan atang chuan ruihhlo (drug) hman sual vanga thi hmasa ber chu kum 1984-ah kan nei tan a. Chuta tang chuan chhinchhiah chinah ruihhlo vangin mi 1881 an thi tawh a heng zinga 230 chu hmeichhia an ni. Kum 2004 kha kum khata ruihhlo vanga thi tam ber tum a ni a, mi 143 zet thi chhinchhiah an ni. Nikum 2024 khan Excise deptt.chhinchiah danin ruihhlo vangin mi 71 an thi a, heng zinga mi 11 hi hmeichhia an ni. A kum hmasa leh 2023-ah khan mi 74 an thi thung.
Hetiang a nih vang hian ruihhlo bakah zu ngawl vei te enkawlna hmun mamawhna hi a sangin a pawimawh hle a. Tunlaia |awngtai Bethel Camping Centre lar ruala chanchin lo lang tel Jordan Centre Sethawn hmun a mi hi tlem i’n bih tel teh ang.
Sethawn:
De-Addiction cum Rehabilitation centre tiin kum 1990 March ni 30 atang khan Mizoram Health Department hnuaiah din tan a ni a. Kum 1993 atangin Social Welfare department kutah hlan a ni. A tir chuan District jail, Armed veng, Aizawl-ah bul tan phawt niin Pu H.Lianngura hmun pek (donate) Sethawn (Kolasib district) hmun ah sawn a ni ta. (Sethawn hmun hi hre ngai lo tan Thingdawl khua nen a inzawm, national highway sir mai awm a ni) kum 2004 hnu lamah phei chuan ruihhlo ngaite enkawl ngawr ngawr bakah an sim hnu pawha mahnia eizawnna nei thei tura training te pek theihna hmunah siam chhoh niin a hming pawh After care centre tia vuah a ni chho a.
Jordan centre:
Hetianga hun rei tak kal hnu hian MNF sawrkar thar 2018 tawp atanga lo piang khan rawn thar thawh leh in, 2019 atangin hma an la a, khatih lai CM Pu Zoramthanga khan ruihhlo ngaite enkawlna hmun changtlung leh lian state pawn te pawhin an hriat tham mi 1000 bawr awmna tur atan siam a ni dawn tiin a puang a. Feb. ni 24, 2019 khan a hming pawh “Jordan centre” tiin an thlak fel a. Independence day 2020-a thusawiah pawh Jordan centre atan SEDP hnuaiah nuai 920.27 ruahman a nih thu a sawi nghe nghe.
Tichuan Kum 2022 April ni 6 khan sum tam taka chei that a nih hnuin khatih lai CM Pu Zoramthanga khan a hawng ta.
Hetianga sum tam tak senga chei thar leh thawktu pawh tam tak lak thar hnu lawkah sawrkar thar ZPM ten mimal kutah dah an rawn tum nghal mai lai hi lo thlir leh thuak thuak ila.
Sum tam tak senga tuaithar, rei lo te chhunga tih tawp tum Jordan centre:
ZPM sawrkar thar thla 6 chauha upa Council of Minister thukhawm chuan ni 18 June 2024 khan Sethawn a ruihhlo ngaite enkawlna hmun Jordan centre chu midang kuta hlan a thupungin a pawm a, hei hi sorkarin a enkawlna tur sum a neih loh vang a ni a, tun dinhmunah a enkawl tur kohhran leh mimal engemaw zat an hmu tawh a, thutlukna erawh an la siam lo tiin chanchinthar lamah kan hmu.
MNF sawrkar chei thar dan hi han enthuak thuak ila.
Nuai 739 chu civil works atan hman niin building 50 renovation/repair bakah a thar 11 an sa. Oriental consultancy services te chu hnathawktu an ni. Rs 11,19,300 tui connection atan. Rs 19,33,188 chu 250 kv transformer atan. Nuai 123.74 chu Jordan centre atan a bungraw lei nan hman a ni bawk. January ni 5, 2021 thawktu mi 147 lak an ni.
Beisei pha lo centre:
MNF sawrkar laia mi 1000 bawr awm theihna tura tihchangtlun tum centre-ah hian February 2022-a ruihhlo ngaite enkawl thar a nih leh khan zirna thiam thil Automobile, ICT leh Electronics te kalpui phawt niin, Agriculture, Veterinary, Horticulture lam te pawh kalpui thuai tum a ni tiin khatih laia Social welfare minister Dr.Beichhua khan a hmun a tlawh tum pawhin a sawi a, mahse a tak ram a chang zo lo a nih hmel.
ZPM sawrkar cabinet meeting-in midang kuta dah an remtih hma lawk, March ni 11, 2024 a social welfare minister Pi Rinpuii tlawh lai in, thawktu nghet director nen mi 40 an awm in, enkawl lai mipa 22 leh hmeichhia 5 chauh an lo awm.
Enkawltu hmu zo lo Jordan centre:
Thawktu lak danah nge, in enkawl dan lamah thil fel lo a awm zawk nge ni, sum tam tak senga din thar centre hi sawrkar thar hian a duh lo hma hle mai a, engemaw tak chu a awm ngei a nih hmel. Sawi tawh angin Cabinet meeting meuhin midang kuta dah a remti a, enkawltu pawh hmu mai tura a insawi laiin January ni 17, 2025-ah chuan Social Welfare & Tribal Affairs (SWTA) department chuan Jordan centre enkawl duh tur an zawnna chu hun tiam chhungin chhangtu an hmu lo tih thuthar a rawn awm ta. Department lam hian December ni 19, 2024 thlenga chhan theih turin invitation of Expression of Interest (EOI ) a chhuah a tu man an chhang lo.
Tlangkawmna:
Tunlai boruak avang hian kar hmasa mai 17 May 2025 khan CM Pu Duha hoin Social welfare minister Pi Rinpuii leh social welfare department hotute an thukhawm a. CM hian Jordan centre pawh after care skill development lamah hma la a, thiam thil zirna lam lo tang turin a chah a, enkawl duh awm ta lo chu sawrkarin enkawl zawm zel a ngai dawn niin a lang. Hemi ni vek chawhnu lamah Social welfare minister hian NGO hruaitu leh kohhran hrang hrang hruaitute hemi subject bawkah hian a thutkhawmpui lehin the Mizoram drug treatment cum Rehabilitation center accreditation rules 2019 leh guidline te zawma center zawng zawngte inziah luh a pawimawh leh tul thu a sawi.
Sawrkar lai leh sawrkar kal tawhte pawhin hemi kawngah an tih tur an ti lova. Mimal enkawl home leh centre, hmunhma nei tha lo zawk leh fund mumal pawh dawng lo, ruihhlo ngai enkawl tur pawha thiamna mumal nei lo zawkte kutah ruihhlo ngaite a dah lutuk a, Excise & Narcotic department leh tlawmngai pawl te man khawm sa pawh heng private home siamte hmunah an nawr liam mai mai vangin tun ang buaina hi kan thleng a ni ber. Sawrkar zawk hian hmun hma tha, enkawlna changtlung zawk hi kalpui tum se la, midang kuta dah tum lo se a tha zawkin a rinawm.