Niger-a tumhmun lian ber beihnaah mi 35 an thi

Silai kengten Niger-a thlawhna tumhmun lian ber an beihnaah mi 35 an thi niin thuneituten an sawi, thla nga pawh tling lo chhunga he hmuna pawikhawihna a thlen vawi hnihna a ni.
Muslim tamna rama chengte chuan BBC hnenah Ningani zing tawngtai an zawh hnu lawkah khawpui lian, Niamey-a awm, Diori Hamani international airport atangin thil puak leh silai ri a awm tih an sawi.
Tlaiah lamah Niger defence ministry chuan thi zingah hian a beitu mi 22, sipai 11 leh civil mi pahnih an tel tih a sawi.
Niger hian kum sawm chhung zet Islamist hel pawl a lo do tawh a, January thla khan Islamic State pawl nena inzawm pawl pakhat chuan he tumhmun hi an lo bei tawh bawk.
Ningania pawikhawihna thlengah hi eng pawl mahin an tih a nih thu an la sawi lo.
Zingkarah tharum thawhna hi a reh zui nghal a, hemi hnu hian venhim hna thawktute chuan pawikhawihtute hi an zawng tan a ni.
Sipai hmunpui pawh a awmna tumhmun bula cheng, Lawalli Tsalha chuan BBC hnenah, “Dar 05:50 (India-a zing dar 10:20) vel khan kan tawngtaina kan zo va, a hnu lawkah thil puak ri kan hre ta a, lirthei ke puak pawh a ni mai thei a. A hnuah thil thleng hi kan hre ta a ni,” a ti.
Chanchinbu leh hmutute chuan pawikhawihtu tam tak man an nih thu an sawi.
Tual chhung mi ralthuam kengte pawhin a titute zawnah hian an tel ve a; mahse, hmutute chuan venhim hna thawktuten civil mite inrawlh chu tul an ti zui lo tih an sawi.
Ningani chawhnu khan tumhmun chhehvel hi khar a ni a, venhim hna thawktuten lirthei lut leh chhuakte pawh an dap.
Diori Hamani international airport hi Niger-a venhimna khauhna ber pawl a ni a, vantlang hman a nih bakah sipai inkulhna a ni tel.
Niger leh a thenawma Mali leh Burkina Faso te awmna, Alliance of Sahel States (AES) nena inzawm hmunte pawh a awm bawk a. Ram pathumte hi sipaite enkawl an ni.
January thlaa tumhmun beihnaah khan sipai paliin hliam an tuar a, beitu mi 20 an thi niin Niger defence ministry chuan a sawi.
Tun hnai chawlhkar engemaw zat chhung khan Niger thuneitute chuan tumhmun bula veng hrang hrangte chu an tichhia a, ‘firfiakte hlauhawm theihna hmun’ a nih thu an sawi.
Tumhmun hung chin pawh an tizau tawh a, surveillance camera 350 chuang an dah tawh niin AFP chuan a tar lang.