North East veteran badminton-ah Mizo team chetha
May ni 10-12, 2024 chhunga Guwahati, Assam-a khelh zawh tak Yonex Sunrise 8th North East Veteran Badminton Tournament-ah Mizoram atanga kal player-te an chetha hle a, gold medal pali vawchhuakin, event pahnihah silver medal an dawng a, bronze medal pakhat an rawn hawn bawk.
A pumpuiah Mizo-ram team hi medal dawng hnem ber niin pakhatna an ni.
He tournament-ah hian Mizoram Police Badminton Club player chhuanvawr pahnih – Lalmuanawma leh Samuel Lalnunmawiate chu category pahnihah ve ve an champion.
Assam Seniors Badminton Club buatsaih tournament hi DTRP Indoor Stadium, Nehru Sports Complex Stadium, Ulubari, Guwahati-a nghah niin, North East state hrang hrang atangin kum 35 chunglam badminton khel thinte an fuankhawm. Lawmman atan hian cheng nuai 4.20 lai sem ral a ni nghe nghe.
Mizoram Badminton Association chuan state pawna Mizoram tihmingthatute hi a chhuangin, an hma hun kal zel atan duhsakna sang ber a hlan tih thuchhuah siamin an tarlang.
Mizoram atanga medal late kan han chhawpchhuak a, bracket chhunga mi hi an kum belhkhawm category a ni.
GOLD MEDAL:
35+ Men’s Double (75+)
Lalmuanawma, MPBC & Samuel Lalnunmawia, MPBC
40+ Men’s Double (85+)
Lalmuanawma, MPBC & Lalrindika Ralte, MBC
35+ Mixed Double (75+)
Samuel Lalnunmawia, MPBC & Lalduhzuali, DBC
55+ MD (115+)
Lalthanzuala, MPBC & C. Vanlalchhuana, EBC
SILVER MEDAL:
35+ XD (75+)
Zarzokima, Ralte Villa BC & Jenny Lalruatmawii Ralte, KODBA
40+ MD (85+)
Joseph M. Lalrinawma & Lalthanliana, Ralte Villa BC
BRONZE MEDAL
50+ Men’s Doubles (105+)
Lalthanzuala, MPBC & C. Vanlalchhuana, EBC
35+ MD (75+)
Joseph M. Lalrinawma & Zarzokima, Ralte Villa BC