North Korea-in bawlhhlawh phur balloon thawnluh belh

North Korea chuan balloon a chhunga bawlhhlawh a khata dah chu South Korea ah a thawnlut leh ta a. Chutih laiin Kim Jong-Un unaunu chuan South Korea-in ‘psychological warfare’ a kalpui zui zel a nih chuan na zawkin chet an lak tur thu a sawi bawk.
Tun hnaiah North Korea chuan bawlhhlawh sikret zuk bung leh toilet paper ang te dahkhawmna balloon te chu South Korea lamah za tel tehmeuh a thawnlut tawh a. North Korea chuan South Korea in anti-Pyongyang propaganda a kalpui thungrulna tiin a sawi.
South Korea sorkar chuan tun thla tir lam khan kum 2018-a boruak muanawm nana military deal an siam chu hnawlin North Korea balloon thawnluh chhanlet nan loudspeaker propaganda a kalpui zui bawk a, chu chuan North Korea tithinrim zual hlein Seoul chu buaina nasa zawk a thleng thei tiin a vau zui nghal a ni.
Kim-a unaunu Kim Yo Jong chuan thuchhuah a siamah South Korea chuan ni tin hnawmhnawk chhar tur a nei char char dawn tiin a vau zui nghal a ni.
Official Korean Central News Agency thuchhuahah Kim Yo Jong chuan South Korea in leaflets leh ‘psychological warfare’ a kalpui chu nataka sawiselin Seoul-in a titawp vat lo va, loudspeaker broadcast chu a kalpui zui zel a nih chuan North chuan nazawkin a chhang let ang a ti bawk.
“ROK hian leaflet thehdarh leh loudspeaker broadcasting a kalpui zui zel a nih chuan DPRK chhanletna natak a tawng dawn” tiin a sawi.
Seoul chuan North in bawlhhlawh phur balloon 310 zan lamah a thawn luh leh thu sawiin, “Tun hnaia bawlhhlawh phur balloon thawn luhah hian paper leh plastic a ni ber a, thil hlauhawm lam hmuh a ni lo,” tiin Seoul Joint Chiefs of Staff chuan a sawi.
Kim a unaunu chuan thuchhuah siam chungchangah “North Korea hian tuna buainaah South Korea chu dem a nih theih nan hma a la a ni,” tiin Kim Dong-yub, University of North Korean Studies, Seoul a professor chuan a sawi.
Buaina chuan zual lam pan zui zel dawna langin North Korea chuan in suangtuah phak aia nasain kan che ang an tihna a ni, tiin Kim chuan a sawi.
Pypongyang chuan thil danglam tak tak flour ang te South Korea ah balloon hmangin a thehdarh thei a, chu chuan South Korea-ah philina siamin North an hlim ve thung ang tiin Kim chuan a sawi bawk.
Tuna buaina hi kumin May thla laihawl vel khan South Korea a awm North Korean chhuahsan ten anti-Kim propaganda leh K-pop music te North Korea hmarlama an thawnluh atanga intan a ni a.
Chumi chhan let nan chuan Pyongyang chuan balwhhlawh dahkhawmna balloon sang chuang chu South lamah a thawn lut a ni, chu chu Seoul chuan ‘low class’ a tihsak a. Chumai bakah kum 1950-1953 Korean War tihtawp nana armistic agreement bawhchhiatna tiin a sawi bawk.
Balloon thawnluh chhanlet nan Seoul chuan kum 2018 military deal chu titawpin ramri ah loudspeaker propaganda a tan tha leh bawk a. Kum 2016 kha a hman hnuhnun ber a ni thung.
Kum 2018 khan hmasawnna awmin Korean ram pahnih hruaitute chuan inrunluihna lam chi reng reng tihtawp ni se an lo ti tawh a, chung zingah chuan leaflets leh broadcast tihtawp te pawh a tel.
South Korean parliament chuan kum 2020 khan North lama leaflet thawnluh chu khapna dan an siam a, mahse, activists te chuan an la thawnlut lui tho va, chu dan chu nikum khan free speech khaptu tiin Constitution Court chuan a titawp nghe nghe a ni.
Loudspeaker broadcast hi Korean war lai atang daih tawha hman tahw niin Pyongyang in a huat ngawih ngawih ni thungin South Korea in atitawp lo a nih chuan artillery hmanga kahchhiatsakah a lo vau tawh thin bawk.