North Korea in ralthuam thar enchhin

North Korea chuan tuihnuai drone ‘radioactive tsunami’ thlen thei ralthuam an enchhin tiin a sawi.
He ‘secret weapon’ hi South Hamgyong province a tuiah enchhin a ni, tiin state news agency KCNA te chuan an sawi a.
Tui hnuai 80 – 150 metres vela thukah darkar 59 zet a hleuh hnuah khawchhak tuipui kam hnaiah a puak tiin a sawi bawk a. Mahse, analysts te chuan North Korea thusawi chu rinngam chiah erawh har an ti thung a.
He ralthuam hi ‘haeil’ tih niin Korean tawnga tusnami tihna niin hmelma lawng bei thei tur leh lawngchawlhna tichhe tura radioactive wave turu buru tak thlen thei tiin KCNA te chuan an tarlang bawk.
“Nuclear underwater attack drone hi khawiah pawh hman theih niin lawnchawlhnaah pawh dah theih niin lawng pawhin a hnuh mai theih a ni” tiin KCNA chuan a tarlang bawk.
North Korean leader Kim Jong Un chuan enchhinnaa a enpui vek tia sawi bawkin US leh South Korea te chu vau nghalin “DPRK in nculear war lama theihna a neih chuan tawp chin a nei lo va chak zawka kalpui mek a ni” tiin a sawi.
US leh South Korea te chuan kum nga chhunga joint military exercise an neih len ber chu Nilaini khan khar a nih hnuah Korean peninsula ah boruak a tang hle a.
North Korea hian ralthuam a enchhin hnuhnung ber chu Russian siam a kaihlek Poseidon torpedo te niin he ralthuam hian radioactive nasa tak pechhuak theiin leh nuclear tsunami siamin US tuipui kam khawpui te tichhe thei a ni tiin a sawi.
Mahse Leif-Eric Easley, professor, Ewha University, Seoul chuan North Korea thusawi chu ngaih khata ngaih chi tiiin a sawi a.
Ankit Panda, nuclear weapons specialist, Carnegie Endowment for International Peace chuan Kim regime hian nuclear attack theihna tam tak neiin a insawi a. North Korea hi lakthutak chi pawh a ni ang a, chutihrual erawh chuan inbumna kalpui a ni thei tho a ti tung.
South Korea President Yoon Suk-yeol thung chuan North korea hian a thiltih man a tuar ang tiin a sawi thung a. “North Korea hian nuclear weapons lam nitin nasa zawka tichak zelin missile lama inrunluihna pawh a ti nasa tual tual a ni” tiin Yoon chuan a sawi.
Karkalta Ningani khan Pyongyang chuan South Korea leh Japan hruaitu lawk tena inbiakna an neih hma lawkin intercontinental ballistic missile a lo kapchhuak tawh bawk a. Kum 2022 chung khan missile 90 chuang a kapchhuak a, kum khata a kahchhuah hnem ber a ni bawk.