North Korea-in satellite kapchhuak tlawlh

North Korea-in space satellite hmasa ber a kahchhuah chu rei lo te hnuah tuipuiah a tla. Pyongyang chuan a thawh hnih nana kahchhuah leh vat a tum thu a sawi nghal a. A hmain Pyongyang chuan 11 June-ah a kahchhuah tur thu a sawi a, a kap chhuak hma ta thut a ni.
Satellite kahchuah hian South Korean capital Seol-ah chuan false alarm siamin Japan pawhin chhim lama Okinawa a chengte chu fimkhur turin a ti bawk a.
Seoul khawpuiah chuan mipuite air raid siren ri avangin an thangharh phah a, emergency message dawngin inlachhuak tura tih niin a hnu minute 20 lekah tihsual palh a nih thu an dawng leh thung.
Korean Peninsula bikah boruak tang tak a awm reng a, ram pahnih te chu kum 70 chuang indo tawh ang niin tuna false alarm ri hian alert system a mipui tena rinna an nghah a tidal thei viau tura ngaih a ni.
South Korea tan chuan North Korea chu hlauhawm niin nakin zelah alert system tihrik a nihin mipui ten ngaih thutak tur nge tihsual palh mai mai tiin an ngaih ang tih chu zawhna awm thei a ni bawk.
Seoul-a cheng kum 33-a upa Kim chuan emergency alert an hria chu an phili buai thu sawiin inla chhuak turin an bag te pawh an hnawhkhah sawk sawk thu a sawi a.
“Indona a awm ka ring ngai lo va, mahse, Ukraine a thil thleng hian North Korea emaw China emaw-in South Korea chu an run duh tak tak rinna min neihtir a ni,” tiin a sawi.
Seoul mayor Oh Se-hoon chuan emergency text an pekchhuah chu an ti lutuk deuha a lan thu a sawi chungin mahse mipuite himna turah engmah chhuanlam a awm tur a ni lo a ti thung.
South Korea military te chuan North Korea missile kahchhuah chu boruaka a awm laia puakkehin tuipuiah a tla tiin an sawi a.
Japanese Prime Minister Fumio Kishida chuan North Korea chuan ballistic missile an kap chhuaka a lan thu sawiin an zirchiang mek a ti bawk a. Japan chuan a hmain an territory tana pawi thei nia an ngaih a awm chuan an kahthlak hmak hmak tur thu an lo sawi tawh bawk.
Thawhlehni khan Ri Pyong Chol, vice-chairman of North Korea’s ruling party’s central military commission chuan satellite kahchhuah an tum thu lo sawi tawhin US leh South Korea sipaite chetna uchuak chhanletna tur a lo ti tawh a ni.
United States leh South Korea, Japan te chuan North Korea chetdan chu UN Security Council resolution bawhchhiatna tiin an dem thu an sawi nghal bawk a.
“Pyongyang tan hian diplomacy lamah kawngka khar a ni lo, mahse, runluihna lam a titawp nghal tur a nia inbiakna lam a hawi a ngai a ni,” tiin Adam Hodge, National Security thupuangtu chuan a sawi.
US chuan an ram leh an thawhpui ram te humhim a nih theih nan a tul tin a ti vek dawn tiin a sawi bawk a.
UN secretary general Antoio Guterres pawhin ballistic missile technology hmanga satellite kahchhuah a tum chu demin UN security council resolution bawhchhiatna a ni tiin a sawi bawk.