Norway in Italy an sawp

Zirtawp zan khan Europe atanga World Cup khel tur zawnna khelh a ni a, Group I-ah Norway chuan an mikhual Italy chu 3-0 ngawtin an sawp. Norway in point 9 lai an hmu tawh laiin Italy in point an la hmu ve lo thung.
Oslo khawpuia Ullevaal Stadion-ah Norway in an group a team hrawl ber Italy lakah bul an tan tha viau a, chawlhlawk hmain goal thum ngawt an thun hman. Mualneitu Norway tan hian Alexander Sørloth chuan minute 14-na lekah hmahruaina goal a thun. Hma takah goal an thun vangin an phur a, an muala mipui pungkhawm thahnem takin ring takin rawl an chhuah reng bawk nen Norway hi inrintawkna sang tak nen an inlan. Italy in an si phurh an sut theih loh laiin Norway tan Antonio Nusa chuan minute 34-naah kawh zetin an goal hnihna a thun leh ta mai a, an hmahruaina a tizau.
Italy in an si phurh sut mamawh viau mah se Norway bawkin goal an thun hmasa nawn leh. Chawlhlawk dawn hnaih minute 42-naah Norway hian fuh zetin Italy tlarhnung an thiat nawn leh a, Erling Haaland chuan chiang zeta Gianluigi Donnarumma a bum hnuin goal ruakah awlsam zetin a pet goal a, an goal thumna a thun. 3-0 ngawta hma an hruai vangin Norway an phur viau a, an hmahruaina tihzau belh ngei tumin tan an khawh.
Football ram ropui ber pawl ni chunga tum hnih ngawt World Cup khel lo zawn tawh Italy hian an si phurh sut tum viau mah se goal thun tur khawpin hun tha an insiamchhuah thei lo. Norway lakah hian hun tawp thlengin goal an thun thei lova, World Cup khel tur zawnnaa an match hmasa berah mualpho takin an tlawm nghal.
Zirtawp zana inkhel dangah Israel an chetha chhunzawm a, mikhual an nihna hmunah 3-1 in mualneitu Estonia an hneh.
A. Le Coq Arena-ah mualneitu Estonia in bul an tan tha a, goal thun hmasa zawkah an tang. Estonia leh Israel te hi goal awm lovin darkar chanve an inkhel tling chiah a, minute 31-naah Mattias Käit chuan mualneitu tan hmahruaina goal a thun. Goal an chhuah hnuin Israel an khel tha zui ve chiah thung a, Dan Biton chuan minute 39-naah goal thunin an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah Israel an khel tha chhunzawm a, goal hnih an thun belh leh. Second half tan atanga minute lina lekah an si phurh sutna goal thuntu Dan Biton chuan hma an hruai letna goal a thun. Hun rei tak 2-1 a hma an hruai hnuin hun tawp dawn hnaiah Israel an chefuh nawn leh a, penalty an hlawhchhuak. Minute 89-ah Mohammad Abu Fani chuan penalty pet goal in an hmahruaina a tizau a, Israel hian Mimualah 3-1 a hnehna changin point thum an hmu.
Group I-ah hian Norway in vawi thum an khel tawh a, chak vekin point 9 an hmu a, hma an hruai chhunzawm zel. Estonia laka chak Israel in khelh thum atanga point 6 hmuin pahnihna an luah a. Estonia in point khat an hmuh tawh laiin Italy leh Moldova ten point an la hmu ve lo thung. Norway, Israel leh Estonia ten vawi thum theuh an khelh tawh laiin Italy hian vawi khat chauh an la khel ve thung.