‘Operation Trident’ hnuaiah mi 18 man, bank account 1,424 hnungkhirh Home Minister-in thawh hona hmanga beihpui thlak dan a sawifiah

Ruihhlo tawlh ruk hluar lutuk tihrem tuma beihpui ‘Operation Trident’ kalpuinaah mi 18 man an ni a, bank account 1,424 hnungkhirh niin, detonator 500 leh pawisa fai cheng nuai 12 man a nih bakah, cheng vaibelchhe 17.82 hu thil neih hrensakna thupek chhuah a ni bawk.
Home minister K. Sapdanga chuan thawhhona hmanga ruihhlo do beihpui thlak a nih dan hi nimin khan thuthar lakhawmtute hmaah a sawifiah a ni.
Home Minister sawi danin, he Operation Trident hi Zirtawpni, Oct 23, 2026 khan Mizoram Police, Narcotics Control Bureau (NCB) leh Directorate of Enforcement (ED) te Tangkawpin Mizoram, Assam leh Manipur-ah an kalpui a. He Operation hi ruihhlo tawlh ruknaa a meizang hlaptute man chhuah leh, narcotic trafficking network zawng zawng chhut chahna tura duan a nih thu home minister chuan a sawi.
Agency hrang hrang aTanga lak khawm Multi-Agency Composite Team 38 te chuan hmun 38-ah a rualin beihpui an thlak a. Mizoram chhungah Aizawl, Champhai, Lawngtlai leh, Indo-Myanmar ramri sumdawnna khawpui pawimawh Zokhawthar te, Manipur-ah Churachandpur leh, Assam-ah Guwahati leh Cachar transit corridor te a huam a ni.
Home minister chuan, ni eng emaw zat chhung intelligence thuruk lak khawmte finfiah a ni a, target-te thliar hran niin, high-level inrawnkhawmna neih fo hnuah he beihpui hi drugs syndicate te logistics leh an sum chetvelna a ruala tihchhiatna tur uluk taka duan a ni a; hmun khat aTanga khaikhawmin, felfai taka kaihhruaina hmangin kan che a ni, a ti.
He beihpuiah hian khawpui lian leh ramri bial harsa tak tak ni mah se, search, enquiries leh financial audits engkim tihhlawhtlin a ni a. Mi man tur zingah tlan bo emaw an thil tih thup bo hman tumah an awm lo hi a hlawhtlinna a ni, a ti bawk.
Agency hrang hrangte chet dan: Mizoram Police chuan Assam Police, Manipur Police leh Central Agency te nen Tangkawpin inter-state drug tawlhruknaa inhnamhnawiha rinhlelh mi 5 an man a, chung mite chu – Guwahati aTangin Basanta Doley, Elajyoti Pegu Doley leh Jitu Kalita te, Churachandpur aTangin Paotinmang Haokip leh Nemhoiting Khongsai te an ni. Heng mite hi ngawrh taka intelligence lakkhawm, backward and forward linkages leh financial transaction analysis hnua man chhuah an ni a, forward/backward linkage, sum tihfelna lam buaipuitu leh drugs phur kualtu leh a hralhna sum insemna buaipuitua rinhlelh an ni.
Directorate of Enforcement (ED), Aizawl leh Imphal Sub-Zonal Office te chuan PMLA Section 17 leh 19 hnuaiah Aizawl, Champhai, Lawngtlai leh, Churachandpur hmun hrang hrangah money laundering case pathum-ah hma an la. Mizoram leh Manipur-a Narco-Trade leh Narco-Hawala Operator te kaihhnawih bank account 1,424 freeze bakah, Mizoram-a awm Narco-hawala operator te thil neih Rs. Vaibelchhe 17.82 hu provisional attachment an ti. Mi 6 an man bawk – pahnih Mizoram-ah, pakhat Gujarat-ah leh pathum Manipur-ah. He beihpui hian hawala operator, mule-account neitu, hmaikawr sumdawnna, Champhai, Aizawl, Lawngtlai leh Churachandpur-a Mini-ATM counter operator leh ruihhlo tawlh nana account pawimawh enkawltu bank branch te a huam a ni.
NCB chuan Mizoram-ah hmun 13-ah beihpui thlakin mi 7 an man a, pawisa fai Rs. nuai 12 leh detonator 500 te misual kut aTanga man a ni. An man te chu Aizawl-ah Lalduhawma leh Suitei te, Champhai aTangin Teresa, Lalbiakhluna, Lalliansanga, Pency leh Laltlanzova Pautu te an ni.
Home Minister chuan, “Operation Trident hian state ramri paltlanga inzawm khawmna mumal tak nena drug tawlhrukna beihna kawngah thawh hona, intelligence in-share tawnna leh sum chevel uluk taka chhui a pawimawhzia a lantir a. Mizoram Police chuan drugs-free Mizoram leh drugs-free India siam tumin intelligence-kaihhruai enforcement ngawrh tak hmangin inter-agency thawh hona nen kan bei zel dawn a ni,” tiin a sawi.